გენერალური ასამბლეა

დღეს კატალონიის “ბარსელონა” კლუბის ფინანსური მდგომარეობის მოგვარებასთან დაკავშირებით ასამბლეას მართავს.

შეხვედრაზე კლუბის 5000 წევრი იყო მიწვეული. 

ჟოან ლაპორტა: 

“ოთახში მყოფებსაც და დისტანციურად დამსწრეებსაც აქ ყოფნისთვის დიდ მადლობას გიხდით. როგორც “ბარსელონას” გულშემატკივრებს, დღესაც მოგიწევთ იმ გადაწყვეტილებების მიღება, რომელიც კლუბის როგორც აწმყოზე, ისე მომავალზე იმოქმედებს. 

მიმდინარე ასამბლეის მიზანია, განვიხილოთ და დავამტკიცოთ ის გზები, რომლებიც ჩვენს ეკონომიკურ მდგომარეობას გააუმჯობესებს.

ხვალ წელიწადი და სამი თვე სრულდება, რაც ოფისი გადმოვიბარეთ – თანაც ისეთ მდგომარეობაში, რომ ჩვენი ხელფასების გადახდაც კი არ შეგვიძლია. 

შეიძლება ითქვას, რომ დღევანდელი “ბარსელონა” ფორმულა 1-ის მანქანაა, რომელსაც არც საწვავი აქვს და არც ძრავა. 

გთხოვთ, რომ ნდობა კვლავ გამოგვიცხადოთ და გარკვეული გაყიდვითი ოპერაციების განხორციელების ნება დაგვრთოთ, რაც სატელევიზიო უფლებების 25%-ისა და BLM-ის (Barça Licensing and Merchandising) 49.9%-ის გასხვისებას მოიცავს.

უსამართლობაა და თქვენი ბრალი არ არის, რომ წინა ხელმძღვანელობამ კლუბი არასწორად მართა. 

იმისათვის, რომ ევროპის დიდ კლუბებთან კონკურენცია განვაგრძოთ, ისეთი პარტნიორები გვჭირდება, რომლებსაც შემოსავალი საფეხბურთო ინდუსტრიიდან არ აქვთ. ჩვენი აქტივისთვის და ბრენდისთვის ბოლომდე ვიბრძვით.

შემოთავაზებები, რომლებიც განვიხილეთ, 200-300 მილიონს ითვალისწინებდა. “ბარსა”, რა თქმა უნდა, მეტისკენ იხრება. ბიზნესგეგმა გვაქვს, რომელსაც, შეუძლია, 6 წელიწადში 1.2 მილიარდი ევრო მოგვიტანოს.

გავის კონტრაქტის გახანგრძლივებასთან ძალიან ახლოს ვართ – საკითხი ბოლო სტადიაზეა.

სატელევიზიო უფლებების 100%-ის 10 წლით გაყიდვაში 1 მილიარდს გვთავაზობდნენ, მაგრამ უარი ვთქვით.

კლუბის სიტუაციის გამოსასწორებლად ორი ბერკეტის გააქტიურება გვჭირდება. საქმეს შუა გზაზე ვერ მივატოვებთ – ამიტომ, თუ პირველ ბერკეტს დაეთანხმეთ, მეორე შემთხვევაშიც ასე მოიქეცით.

ყოველი 10%-ისთვის, რომელსაც გავყიდით, 200 მილიონს მივიღებთ. შესაბამისად, სატელევიზო უფლებების 25%-ის გასხვისება 500-მილიონიან შემოსავალს ნიშნავს.

ლა ლიგამ გვითხრა, რომ, ფინანსური Fair Play-ს წესების დაცვის გარეშე, ჩვენი აკადემიის ახალგაზრდებსაც კი ვერ დავარეგისტრირებთ.”

ჟული გუიუ:

“ორი გზა გვაქვს: აქტივების მცირე ნაწილის გაყიდვით მივიღოთ შემოსავალი, შემდეგ კი მისი გამოსყიდვის უფლება გამოვიყენოთ.

იმ ყველაფრის შემდეგ, რაც პრეზიდენტმა თქვა, გთხოვთ, გვენდოთ, რადგან ეს შესაძლებლობაა, რომ კლუბი განვითარდეს – ამისთვის კი გვჭირდება, BLM-ის 49.9% გავყიდოთ, რაც “ბარსას” კომპანიის 100%-ის ძალიან მცირე სეგმენტია: თანაც, მისი გამოსყიდვა ნებისმიერ დროს შეგვეძლება.”

BLM-ის 49.9%-ის გაყიდვასთან დაკავშირებით ხმის მიცემა დაიწყო.

568 ხმა 65-ის წინააღმდეგ – კლუბის წევრებმა BLM-ის 49.9%-ის გაყიდვას მხარი დაუჭირეს! 13-მა წევრმა აზრის დაფიქსირებაზე უარი განაცხადა.

ცნობისთვის, BLM-ის დაარსებამდე, “ბარსელონას” ატრიბუტებს მხოლოდ Nike ასხვისებდა, თუმცა, 2018 წელს, კლუბის ყოფილმა პრეზიდენტმა, ჟოზეპ მარია ბართომეუმ ზემოხსენებული ორგანიზაცია შექმნა, რის შემდეგაც კატალონიელებმა ეს ბიზნესი მთლიანად გადმოიბარეს. შესაბამისად, ამის წყალობით “ბლაუგრანას” ატრიბუტიკას მხოლოდ კლუბი ყიდდა, რაც შემოსავლებს საგრძნობლად ზრდიდა, დღეს კი ამ ორგანიზაციის 49.9%-ის გასხვისება გადაწყდა.

სატელევიზიო უფლებების 25%-ის გაყიდვაზე ხმის მიცემა დაიწყო.

494 მომხრე, 62 წინააღმდეგი – “ბარსამ” სატელევიზიო უფლებების 25%-ის გაყიდვის ნებართვა მიიღო. 13-მა წევრმა პასუხის გაცემაზე კვლავ უარი თქვა.