ესპანეთის სუპერ თასის წყვილები ცნობილია

“ბარსელონას” მიერ ლა ლიგაში მე-2 ადგილის განაღდების შემდეგ ესპანეთის სუპერ თასის 2022/23 წლების სეზონის ყველა გუნდი და ნახევარფინალური წყვილებიც ცნობილია.

სუპერ თასზე, რომელიც 2023 წლის იანვარში საუდის არაბეთში გაიმართება, ესპანეთის ჩემპიონი “რეალი”, მე-2 ადგილზე გასული “ბარსელონა”, ქვეყნის თასის მფლობელი “ბეტისი” და ფინალისტი “ვალენსია” ითამაშებენ.

ნახევარფინალში “ბარსელონას” მეტოქე “ბეტისი” იქნება. შესაბამისად, მეორე წყვილში “რეალი” და “ვალენსია” ითამაშებენ.

“ბეტისი” ესპანეთის სუპერ თასზე ისტორიაში მეორედ ითამაშებს. პირველად ეს 17 წლის წინ, 2005 წელს მოხდა, როდესაც სევილიელები “ბარსასთან” 2 მატჩის ჯამში 2-4 დამარცხდნენ. “ბარსელონა” კი ამ ტურნირზე ყველაზე გამოცდილი გუნდია. კატალონიელები ტურნირის მოგებისთვის 27-ედ იბრძოლებენ. წინა 26 მცდელობიდან “ბარსამ” მიზანს 13-ჯერ მიაღწია, რაც ასევე რეკორდია.