გავი ბარსელონასგან შეთავაზებას ორი თვეა, ელოდება

“ბარსელონას” ახალგაზრდა ნახევარმცველი გავი და მისი წარმომადგენლები უკვე 2 თვეა, ელოდებიან, როდის დაუკავშირდებიან მათ კლუბიდან ახალი კონტრაქტის თაობაზე.

გავის კონტრაქტს ვადა 2023 წელს გასდის და ცნობილია, რომ მასთან ახალი ხელშეკრულების გაფორმება “ბარსას” ერთ-ერთი პრიორიტეტია. მოლაპარაკებები დეკემბერში დაიწყო, მაგრამ თავიდანვე ცხადი გახდა, რომ მხარეების მოთხოვნები ერთმანეთს დაშორებული იყო.

ვინაიდან იანვარში “ბარსელონას” პრიორიტეტი გუნდის გაძლიერება იყო, ახალ კონტრაქტებზე მუშაობა დაპაუზდა. მაშინ ითქვა, რომ “ბარსელონა” ფეხბურთელს ერთი კვირის ან 10 დღის განმავლობაში დაუკავშირდებოდა, მაგრამ ასე არ მოხდა.

უკვე 2 თვე გავიდა და თუ Sport-ს დავუჯერებთ, გავის წარმომადგენლები ისევ მოლოდინის რეჟიმში არიან. არადა კლუბში აცხადებენ, რომ ყველაფერი სწორი მიმართულებით მიდის.

კლუბის მხრიდან დუმილის მიუხედავად თავად ფეხბურთელს ეჭვი არ ეპარება, რომ კარიერა სწორედ “ბლაუგრანაში” უნდა განაგრძოს და არა რომელიმე ევროპულ გრანდში, რომელიც მზადაა, გავის გამოსასყიდი თანხა 50 მილიონი ევრო დღესვე გადაიხადოს. ასეთი გრანდი კი არაერთია.