ელ კლასიკოს შვიდი შესაძლო დებიუტანტი

ხვალ, ესპანეთის სუპერ თასის ნახევარფინალის ეგიდით “ბარსელონასა” და მადრიდის “რეალს” შორის გასამართი შეხვედრა მიმდინარე სეზონში რიგით მეორე “ელ კლასიკო” იქნება. ლა ლიგის პირველ წრეში გამართული მატჩი “ბარსას” ოთხი ფეხბურთელისთვის: გავისთვის, ერიკ გარსიასთვის, სერხიო აგუეროსა და მემფის დეპაისთვის სადებიუტო “ელ კლასიკო” იყო, ხვალინდელ დაპირისპირებაში კი ამის შანსი კიდევ 7 ფეხბურთელს ექნება.

ნიკო გონსალესი

20 წლის ნახევარმცველმა პირველი მატჩი “რეალ სოსიედადის” წინააღმდეგ ჩაატარა და მას შემდეგ შემადგენლობის რეგულარული წევრი გახდა. ნიკომ მიმდინარე სეზონში 1250 წუთი თამაშა და 2 გოლისა და 2 საგოლე გადაცემის შესრულება მოასწრო. დიდი ალბათობით, ის ხვალ “რეალის” წინააღმდეგ ითამაშებს.

ალეხანდრო ბალდე

“ლა მასიას” ახალგაზრდა წევრს დებიუტი გასული წლის 20 სექტემბერს, “გრანადას” წინააღმდეგ, მარცხენა მცველის პოზიციაზე ჰქონდა, თუმცა შემდგომაში მან გარემარბის პოზიციაზეც იასპარეზა. 18 წლის უნივერსალმა ჯამში 117 წუთი ითამაშა და, შესაძლოა, შანსი “ელ კლასიკოშიც” მიეცეს.

აბდე ეზალზული

მაროკოელი შემტევი, რომელიც “ბარსამ” “ელჩედან” დაიმატა, მიმდინარე სეზონის ერთ-ერთი აღმოჩენაა. ეზალზული პირველად სერჟი ბარჟუანმა დააწინაურა და მას ჩავი ერნანდესიც ხშირად ენდობა. 20 წლის აბდემ 510 წუთი ითამაშა და 1 გოლის გატანა მოახერხა. შეტევაში არსებული პრობლემების გათვალისწინებით, “რეალთან” მისი გამოყენება მოსალოდნელია.

ფერან ჟუტგლა

ჟუტგლა პირველ გუნდში “მარადონას თასზე” “ბოკა ხუნიორსის” წინააღმდეგ გამოჩნდა, სადაც თავიც გამოიჩინა. მას შემდეგ ჩავი ერნანდესი ესპანელს ლა ლიგაშიც ათამაშებს და დიდი შანსია, ის “ელ კლასიკოშიც” ვიხილოთ.

ალვარო სანსი

სანსი 2015 წლიდან “ბარსელონა ბ-ს” წევრია, პირველ გუნდში დებიუტი კი 2 იანვარს, “მალიორკას” წინააღმდეგ ჰქონდა. 20 წლის ნახევარმცველი “ბარსას” სისტემას იდეალურად ერგება და “რეალის” წინააღმდეგ მისთვის თამაშის შანსის მიცემა არ უნდა გაგვიკვირდეს.

ინიაკი პენია

პენია დიდი ხანია, “ბარსას” მესამე მეკარეა, თუმცა პირველ გუნდში დებიუტი ჯერ არ ჰქონია. “ელ კლასიკოშიც” მისი თამაშის მხოლოდ თეორიული შანსები არსებობს.

ფერან ტორესი

კორონავირუსის დამარცხების შემდეგ, “ბარსას” ახალწვეული საუდის არაბეთში, დღეს დილით, პედრისთან ერთად გაემგზავრა და გუნდს შეუერთდა. დიდი შანსია, ტორესის დებიუტი სწორედ “ელ კლასიკოში” შედგეს.