ლა ლიგის კალენდარი ცნობილი ოთხშაბათს გახდება

კატალონიური Mundo Deportivo-ს ცნობით ლა ლიგის მომდევნო სეზონის კალენდარი ჩვეულზე ადრე იქნება ცნობილი. როგორც წესი კალენდარი ივლისის შუა რიცხვებში ქვეყნდება, ამჯერად კი ეს ივნისის ბოლო დღეს მოხდება.

ლა ლიგის 2021/22 წლების გათამაშება 2021 წლის 13 აგვისტოს, პარასკევ დღეს დაიწყება და 2022 წლის 23 მაისს დასრულდება. პირველი ტურის შეხვედრების დროები თამაშებამდე დაახლოებით 3 დღით ადრე გახდება ცნობილი და ის კონკრეტულ ქალაქებში ამინდის პროგნოზზე იქნება დამოკიდებული.

ესპანურ გუნდებს საშობაო შესვენება ექნებათ. ფეხბურთელები შვებულებაში 23 დეკემბერს გავლენ, ტურნირი კი 2 იანვარს განახლდება.

ლა ლიგის დასრულებამდე ზუსტად 1 თვით ადრე გაიმართება ესპანეთის თასის ფინალი. რაც შეეხება ქვეყნის სუპერ თასს, რომლის ნახევარფინალშიც “ბარსელონა” “რეალს” დაუპირისპირდება, 12-16 იანვარს ჩატარდება.

დიდი ალბათობით ლა ლიგის ახალ სეზონს 3 გასვლითი თამაშით დაიწყებს “რეალი”. მადრიდელებმა ფეხბურთის ფედერაციას თხოვნით თავად მიმართეს, მიზეზი კი ისაა, რომ “სანტიაგო ბერნაბეუ”, მიმდინარე სარემონტო სამუშაოების გამო, 11 სექტემბრამდე თამაშების მასპინძლობისთვის მზად არ იქნება.