ტერ შტეგენი ფლიკთან ურთიერთობასა და ბარსელონაში შესაძლო დაბრუნებაზე საუბრობს

“ბარსელონას” მეკარემ, მარკ-ანდრე ტერ შტეგენმა, რომელიც ამჟამად ამსტერდამის “აიაქსში” იჯარით თამაშობს, კატალონიურ კლუბში თავის მომავალსა და ჰანსი ფლიკთან ურთიერთობაზე ისაუბრა.

გერმანიის ნაკრების შეკრებაზე მყოფმა 34 წლის მეკარემ Sport Bild-ს ინტერვიუ მისცა და აღნიშნა, რომ “ბარსელონას” მთავარ მწვრთნელთან ბოლო პერიოდში ურთიერთობა არ ჰქონია.

“ჰანსისთან ბოლო პერიოდში კონტაქტი არ მქონია. სამაგიეროდ, რამდენიმე ფეხბურთელს დროდადრო ვესაუბრები, რათა გავიგო, როგორ არიან.”

ტერ შტეგენმა განმარტა, რომ მიუხედავად “აიაქსში” გადასვლისა, ყოფილი გუნდის შედეგებს კვლავ ყურადღებით ადევნებს თვალს.

“ბარსელონას” შედეგებს საკმაოდ რეგულარულად ვადევნებ თვალს და ზოგჯერ მის მატჩებსაც ვუყურებ, როდესაც ისინი “აიაქსის” შეხვედრებს არ ემთხვევა.”

გერმანელ მეკარეს “ბარსელონასთან” კონტრაქტი 2028 წლის ზაფხულამდე აკავშირებს. მიუხედავად იმისა, რომ კატალონიურ გუნდში ამჟამად სამი მეკარეა – ჟოან გარსია, ვოიცეხ შჩესნი და დომინიკ ლივაკოვიჩი – ტერ შტეგენი მომავალ ზაფხულს დაბრუნების შესაძლებლობას არ გამორიცხავს. აღსანიშნავია, რომ შჩესნის ხელშეკრულება 2027 წლის ივნისში ეწურება.

“ბარსელონაში” 12 წელი ვითამაშე და ამიტომ ამ კლუბთან ძალიან მჭიდრო კავშირი მაქვს. ახლა მხოლოდ ნოემბერია, ამიტომ ნამდვილად ვერ ვიტყვი, რა მოხდება მომავალ ზაფხულს.”

ტერ შტეგენი მანუელ ნოიერთან კონკურენციაზე

ინტერვიუს დროს ტერ შტეგენმა გერმანიის ნაკრებში მანუელ ნოიერთან მრავალწლიან კონკურენციაზეც ისაუბრა. მან აღიარა, რომ ყოფილი თანაგუნდელი ყველა დროის ერთ-ერთი საუკეთესო მეკარეა, თუმცა თავადაც სურდა ნაკრების ძირითად შემადგენლობაში უფრო ხშირად თამაში.

“მანუელ ნოიერი უბრალოდ შესანიშნავი მეკარე არ არის. თავს ნუ მოვიტყუებთ: ის, ალბათ, ყველა დროის ერთ-ერთი საუკეთესო მეკარეა. ნაკრებშიც უდიდესი პატივისცემით სარგებლობდა და სრულიად დამსახურებულად. თუმცა, მასაც ტრავმები აფერხებდა. სამწუხაროდ, ჩემზე უკეთ ვინ იცის, რას ნიშნავს ეს…”

“ვფიქრობ, გარკვეული დონის კონკურენცია ძირითად მეკარესაც ეხმარება განვითარებაში. ჩვენს შემთხვევაშიც ასე იყო. მერჩივნა, მე მეთამაშა? რა თქმა უნდა! მაგრამ ნაკრების მწვრთნელები მანუს ირჩევდნენ. ამას პატივი უნდა ვცე და უნდა მივიღო. ეს უბრალოდ ფეხბურთის ნაწილია.”

ტერ შტეგენმა არ დამალა, რომ ზოგიერთ შემთხვევაში მწვრთნელების გადაწყვეტილებებით იმედგაცრუებული რჩებოდა და მიაჩნდა, რომ მეტ შესაძლებლობას იმსახურებდა.

“იყო მომენტები, როდესაც ენა უნდა მომეკვნიტა და იმედგაცრუება ჩემთვის შემენახა? ყოფილა შემთხვევები, როცა ჩემთვის, ჩუმად ვბრაზდებოდი, ისე, რომ არავის ესმოდა? რა თქმა უნდა! ზოგჯერ ისიც მიგრძნია, რომ შესაძლოა, მეტ შანსს ვიმსახურებდი.”

განსაკუთრებით მტკივნეულად გერმანელს 2018 წლის მსოფლიო ჩემპიონატი ახსენდება. მაშინ, მიუხედავად იმისა, რომ ნოიერს რვათვიანი ტრავმა ახალი მოშუშებული ჰქონდა, ნაკრების ძირითად მეკარედ მაინც ის აირჩიეს.

“ეს ჩემთვის ყველაზე მწარე მომენტი იყო, თუმცა ამ თემაზე დაბრუნება აღარ მინდა. საბოლოოდ გადაწყვეტილებას მწვრთნელი იღებს. რამდენიც არ უნდა გაბრაზდე, ამით არაფერი შეიცვლება.”

ტერ შტეგენი გერმანიის ნაკრებთან ერთად ერთა ლიგის მომდევნო შეხვედრისთვის ემზადება. გერმანელები 13 ნოემბერს სერბეთს დაუპირისპირდებიან.