ვამაყობ, რომ ბარსელონას ნაწილი ვიყავი – ივან რაკიტიჩის ინტერვიუ

“ბარსელონას” დატოვება და “სევილიაში” გადმოსვლა? ეს განსაკუთრებულად რთული არ ყოფილა. “ბარსა” მსოფლიოს ერთ-ერთი უდიდესი კლუბია. იქ 6 წელი გავატარე და მონაწილეობა 311 თამაშში მივიღე.

“ბარსაში” დიდ სიამოვნებას ვიღებდი. ზოგჯერ შენს ირგვლივ მოედნის ფარგლებს მიღმა რაღაც ემოციური ხდება, რაც იმის მანიშნებელია, რომ რაღაც ახალი გააკეთო. ასე იყო ჩემს შემთხვევაშიც.

როდესაც “ბლაუგრანას” ვტოვებდი, არ ვწუხდი, ბედნიერი ვიყავი. 13 ტიტული ცუდი არაა, ხო? თუმცა, უფრო მეტიც შეიძლებოდა. ვამაყობ, რომ “ბარსას” ნაწილი ვიყავი.

MSN-ის ეპოქა? ეს საოცარი და სამწუხაროდ, ნეიმარის წასვლის გამო, ძალიან ხანმოკლე პერიოდი იყო.

ვგრძნობდი, რომ მესი, სუარესი და ნეიმარი ყოველთვის სხვებისგან განსხვავებულ რაღაცას აკეთებდნენ. მათი ზურგს უკან თამაში უდიდესი პატივი იყო. MSN შეტევის ყველა დროის საუკეთესო ტრიოა.

ჭორები მესის გამომშვიდობებაზე, როდესაც ის “ბარსას” ტოვებდა? როგორც ყველა, მეც ძალიან გაკვირვებული და შოკირებული ვიყავი. როდესაც ლეო არ ვარჯიშობდა, გულშემატკივრების 90% ფიქრობდა, რომ ის წავიდა. მესი “ბარსელონას” საფეხბურთო ისტორია არაა, ის ამ კლუბის ნაწილია.

ძალიან ბედნიერი ვარ, რომ მესი დარჩა. იმედი მაქვს, ის “ბარსაში” კიდევ რამდენიმე წელი ითამაშებს. ლეომ რაც არ უნდა გადაწყვიტოს, პატივი უნდა სცეთ. მას ყველაფერს საუკეთესოს ვუსურვებ.

ადრე, როდესაც მივანიშნე, რომ მესი ჩემი საუკეთესო მეგობარი არაა, იმის თქმას ვცდილობდი, რომ სხვა არცერთი ფეხბურთელის უახლოესი მეგობარი არ ვყოფილვარ. თუმცა, ეს საკმაოდ ნორმალურია.

მარკ-ანდრე ტერ შტეგენთან უფრო ახლოს ვიყავი, ვიდრე ლეოსთან. ჩვენი ოჯახები ერთმანეთს ხშირად ხვდებოდნენ. კონტაქტი ახლაც გვაქვს.

ლეო სუარესის კარგი მეგობარია. მე ანდრეს ინიესტას და კევინ-პრინს ბოატენგის მეგობარი ვარ. ფეხბურთში მრავალი წლის განმავლობაში ახლო მეგობრობა ძალიან იშვიათია.

მე და მესის შესანიშნავი ურთიერთობა გვქონდა. თამაშების შემდეგ მიმოწერა ისევ გვაქვს, თუმცა საუკეთესო მეგობრები არ ვართ. ერთმანეთს ძალიან დიდ პატივს ვცემთ.