“ბარსელონა” აგუეროს ხელფასის მინიმუმ განახევრებას სთავაზობს

კატალონიური Sport ავრცელებს პირობას, რომლის შესრულების შემთხვევაშიც “ბარსელონა” მზადაა სერხიო აგუერო დაიმატოს. საუბარი ხელფასის მნიშვნელოვნად შემცირებაზეა.

ბოლო დროს არაერთმა გამოცემამ გაავრცელა ინფორმაცია, რომლის თანახმადაც, ჟოან ლაპორტას 32 წლის არგენტინელის უფასოდ დამატება უნდა. უშუალოდ სერხიოს სათამაშო კლასის გარდა, მის ტრანსფერში მიმზიდველი ისაა, რომ ფეხბურთელის დამატება ლეო მესის “ბლაუგრანაში” დარჩენის შანსებს ზრდის.

ვეტერანი ფეხბურთელი “მანჩესტერ სიტიში” წელიწადში 15 მილიონ ევროს გამოიმუშავებს, “ბარსელონასთვის” კი ეს ძალიან დიდი თანხაა. Sport-ის ცნობით კატალონიელები აგუეროსთან მოლაპარაკებებს იმ შემთხვევაში დაიწყებენ, თუ ფეხბურთელი ხელფასის მინიმუმ განახევრებას დასთანხმდება.

არაა გამორიცხული, “ბარსამ” აგუერო ამ პირობაზე დაითანხმოს. არგენტინელმა 15 მილიონიანი კონტრაქტი “სიტისთან” 2018 წელს გააფორმა, როდესაც ფეხბურთსაც უფრო მაღალ დონეზე თამაშობდა და ტრავმებიც ხელს ნაკლებად უშლიდა. ამას პანდემია ემატება და ამ ფაქტორების გათვალისწინებით სერხიო შეგუებული უნდა იყოს, რომ ხელფასის მნიშვნელოვანი შემცირება ნებისმიერ შემთხვევაში მოუწევს, სადაც არ უნდა განაგრძოს კარიერა.