როდესაც, ბოლოს პსჟ-მა “ბარსელონა” ჩემპიონთა ლიგას გამოთიშა…

მიუხედავად იმისა, რომ “ბარსელონა” და პსჟ ბოლო დეკადაში ერთმანეთს არც თუ ისე იშვიათად ხვდებიან, პარიზელებს კატალონიელთა დამარცხება ძალიან უჭირთ.

2014/2015 წლების სეზონში ეს გუნდები ერთმანეთს ჩემპიონთა ლიგაზე 2-ჯერ გადაეყარნენ, ჯერ ჯგუფურ ეტაპზე, სადაც პარიზელებმა კატალონიელების ჯგუფში ჩატოვება ვერ მოახერხეს, შემდეგ 1/4 ფინალურ ეტაპზე ორივე მატჩში დამარცხდნენ (1:5 ჯამში). საბოლოოდ იმ სეზონში “ბარსა” ტიტულსაც დაეუფლა.

მანამდე 2012/2013 წლების სეზონში ასევე 1/4 ფინალში დაუპირისპირდნენ ერთმანეთს, ორივე მატჩი ფრედ დასრულდა და სტუმრად გატანილი გოლების წყალობით მომდევნო ეტაპზე “ბარსა” გავიდა.

ფრანგები სანატრელ მიზანთან ყველაზე ახლოს ალბათ მაინც 2017 წელს იყვნენ, როდესაც კატალონიელებმა პასუხად ცნობილი “La Remontada” მოუწყვეს.

დღემდე ერთადერთი შემთხვევა, როცა “პარი სენ-ჟერმენმა” “ბარსელონა” ჩემპიონთა ლიგიდან გამოთიშა ეს იყო 1994/1995 წლების სეზონი, ისევ 1/4 ფინალური ეტაპი. პირველი მატჩი “კამპ ნოუზე” ფრედ 1:1 დასრულდა, “პრაკ დე პრენსზეც” ანალოგიური ანგარიში ფიქსირდებოდა რომ არა ვინსენტ გუერინის 83-ე წუთზე გატანილი გოლი.

ანგარიში ორივე თამაშში “ბარსელონამ” გახსნა, თუმცა საბოლოოდ პარიზელებმა ორი მატჩის ჯამში 3:2 იმარჯვეს და ნახევარფინალში გავიდნენ.

გავიხსენოთ რა ხდებოდა იმ დროს:

გასაგებია ის ფაქტი, რომ “ბარსელონას” ფეხბურთელთა დიდი ნაწილი მაშინ ჯერ დაბადებულიც კი არ იყო.

ლიონელ მესი – ლეო რამდენიმე თვის მისული იყო “ნიუელსის” აკადემიაში და ჯერ კიდევ 5 წელი აკლდა კატალონიის დედაქალაქში გადაბარგებამდე, მესი მაშინ სულ რაღაც 8 წლის იყო.

სერხიო ბუსკეტსი – სერხიოს მაშინ აკადემიაშიც კი არ ჰქონდა დაწყებული თამაში, ის 7 წლის იყო, ალბათ თვალს ადევნებდა ამ თამაშს და მამას გულშემატკივრობდა, რომელიც “ბარსელონას” კარს იცავდა იმ შეხვედრაში.

ჟერარ პიკე – იმ დროს, სერხიოს მსგავსად, ჯერ არც პიკეს ჰქონდა აკადემიაში კარიერა დაწყებული, ისევე როგორც ჟორდი ალბას.

რონალდ კუმანი – “ბარსელონას” ამჟამინდელი მთავარი მწვრთნელი იმ შეხვედრაში თამაშობდა და სამწუხაროდ ვერაფერი გააწყო პარიზელთა შეტევის წინააღმდეგ.

ჟორდი კრუიფი – ჟორდი, რომელიც დიდი ალბათობით მალე ჟოან ლაპორტას გუნდს შეუერთდება, იმ მატჩში “ბარსელონას” სათადარიგოთა სკამზე იჯდა, თუმცა მამამისმა მოედანზე შესვლის უფლება არ მისცა.

ხულენ ლოპეტეგი – “ბარსელონას” “La Remontada-ს” ბოლო მსხვერპლი კატალონიელთა სათადარიგო მეკარე იყო და 90 წუთი მანაც სკამზე გაატარა, სერხიოს მამას იმ შეხვედრაში შეცვლა არ დასჭირვებია.

პეპ გუარდიოლა – პეპმა პირველ შეხვედრაში ტრავმა მიიღო და მე-19 წუთზე შესაცვლელი გახდა, დაზიანების გამო მოუწია საპასუხო მატჩის გამოტოვებაც.

ჰრისტო სტოიჩკოვი – ოქროს ბურთის მაშინდელი მოქმედი მფლობელი ძირითად შემადგენლობაში იყო, თუმცა გოლის გატანა ვერ მოახერხა.

ჯორჯ ვეა – ოქროს ბურთის მომდევნო გამარჯვებული, რომელიც ბოლო სეზონს ატარებდა პსჟ-ში, შემდეგ “მილანში” გადავიდა. პირველ მატჩში ანგარიში სწორედ ვეამ გაათანაბრა.

დღეს კი პარიზელებს შანსი აქვთ, რომ 26-წლიანი ლოდინის შემდეგ, ბოლოს და ბოლოს, “ბარსელონა” ჩემპიონთა ლიგას გამოთიშონ. ვნახოთ…