“ბარსელონა” ლა ლიგის 21-ე ტურის შეხვედრას “კამპ ნოუზე” “ბილბაოსთან” გამართავს.

ეს გუნდებს შორის ბოლო 1 თვის განმავლობაში მე-3 დაპირისპირებაა. ლა ლიგის ეგიდით “ბარსამ” ანგარიშით 3-2 იმარჯვა, ესპანეთის სუპერ თასზე კი ფინალში “ბილბაომ” ანალოგიური ანგარიში თავისდა სასარგებლოდ დააფიქსირა.

დღეს კატალონიელებს დათმობილი თასის შემდეგ რევანშის აღების საშუალება ექნებათ. ქვემოთ კი 3 სახის ტაქტიკურ მონახაზს განვიხილავთ,  რომელთაგან ერთ-ერთსაც, შესაძლოა, ნიდერლანდელი სპეციალისტი ენდოს.

ვარიანტი N1

რეალურად, სწორედ ასეთი შემადგენლობის დაყენებაა ყველაზე მოსალოდნელი “ბილბაოსთან”. სერჟი რობერტოს ჯერ არც ერთ შეხვედრაში არ მიუღია მონაწილეობა და თავიდანვე ძირითად შემადგენლობაში განწესება ლოგიკური არ უნდა იყოს. მარჯვენა მცველად ისევ ოსკარ მინგესა გადაიწევს.

მირალემ პიანიჩი დისკვალიფიცირებულ სერხიო ბუსკეტსს ჩაანაცვლებს, ხოლო მოწინავე ოთხეული ამ დროისათვის ყველაზე ეფექტური შემტევი კვარტეტის სახით მოგვევლინება.

ვარიანტი N2

აქ უკვე რონალდ არაუხოსთან ცენტრალური დაცვის დუეტში, კლემან ლანგლეს ნაცვლად, ოსკარ მინგესას ვხედავთ. ლანგლეს ბოლო შეხვედრაში საკმაოდ ბევრი შეცდომა ჰქონდა. 

მინგესას ცენტრში დაყენება მარჯვენა მცველის პოზიციაზე სერჟი რობერტოს დაყენებას გამოიწვევს.

ნახევარდაცვაში კი მირალემ პიანიჩის ნაცვლად ძირითადში რიკი პუჩის კიდევ ერთხელ ვიხილავთ.

ვარიანტი N3

იმ შემთხვევაში, თუ რონალდ კუმანს ანტუან გრიზმანის ძირითადში დაყენება არ მოესურვება, მას შეუძლია გუნდი 3-მცველიან ექსპერიმენტულ ფორმაციაზე ისევ გადააწყოს.

ეს ტაქტიკა “ვალიადოლიდთან” “ბარსას” მარტივი 3 ქულის მოპოვებაში დაეხმარა.