რა მოხდა სტამბოლში? – “ბარსელონამ” საკუთარი მოთამაშე თვითმრფინავში არ აუშვა

“ბარსელონა” ღრმა კრიზისშია. საუბარი არც მხოლოდ ფეხბურთზე გვაქვს და არც მხოლოდ სპორტულ შედეგებზე – მოედანს მიღმა კლუბი ჩამოშლილია.

ამის ერთ-ერთი მტკიცებულება რამდენიმე დღის წინ მომხდარი რბილად რომ ვთქვათ არცთუ სასიამოვნო ფაქტია.

“ბარსელონას” საკალათბურთო გუნდი სტამბოლში ევროლიგის შეხვედრას ატარებდა. კატალონიელთა ფრანგი კალათბურთლი ტომა ერტელი “ანადოლუ ეფესთან” გამართული მატჩის განაცხადში ვერ მოხვდა. მან თამაშს თვალი ტრიბუნებიდან მიადევნა. ამის მიზეზი ისაა, რომ “ბარსამ” ერტელი “დასაჯა”.

31 წლის გამთამაშებელებს “ბლაუგრანასთან” კონტრაქტი მიმდინარე სეზონის ბოლოს ეწურება. ადრე არსებული ინფომრაციით, ის მოლაპარაკებებს “ფენერბაჰჩესთან” აწარმოებდა, მაგრამ ცოტა ხნის წინ გაირკვა, რომ ერტელი მადრიდის “რეალთან” ფარულ მოლაპარაკებებს მართავდა. ამის გამო მოთამაშის დასჯა და განაცხადს მიღმა დატოვება გასაკვირი ნამდვილად არაა, მაგრამ…

თამაშის შემდეგ ტომა ერტელი “ბარსელონას” თვითმრიფნავში არ აუშვეს და ის სტამბოლში დატოვეს. კალათბურთელმა თავი ჯერ თანამემამულე კალათბურთელს შეაფარა, შემდეგ კი ბარსელონაში ლიონის გავლით დაბრუნდა. სტატიის მთავარი სურათი სწორედ ლიონშია გადაღებული, სადაც ერტელი მოსკოვის ცსკა-ს კალათბურთელებს შემთხვევით შეხვდა.

“ბარსელონას” ყოფილმა ფრანგმა კალათბურთელმა, კევინ სერაფინმა მომხდარის კომენტირებისას Twitter-ზე დაწერა, რომ მას “ბარსელონასგან” ასეთი რამ არ უკვირს. მან კლუბის თანამშრომლებს საახალწლოდ ჭკუა უსურვა.

მომხდართან დაკავშირებით ოფიციალური განცხადება გააკეთა “ბარსელონამ”. კატალონიელები ტომა ერტელის თურქეთში დატოვებას ადასტურებენ, მაგრამ აცხადებენ, რომ მისთვის სასტუმროც დაჯავშნილი იყო და მეორე დღეს კატალონიაში დასაბრუნებელი ბილეთიც.

ესეც ტომას ერტელი 4 წლის წინ, თურქეთში, “ბარსელონაში” გადმოსვლამდე, “რეალის” მაისურით.