დინამო-ბარსელონა – მატჩისწინა მიმოხილვა

დიდი შანსია, დღეს ჩემპიონთა ლიგის G ჯგუფიდან 1/8-ფინალში გამსვლელი ორივე გუნდის ვინაობა გაირკვეს. ამისთვის საკმარისია, რომ “ბარსელონამ” და “იუვენტუსმა” არ წააგონ.

სათქმელად მარტივია, მაგრამ როდესაც კუმანის “ბარსელონა” ხარ, ანუ ისედაც შენი გაგჭირვებია, თან პიკე, ბუსკეტსი, ფატი, სერჟი რობერტო, არაუხო და უმტიტი გაკლია, ამას მესისა და დე იონგის დანაკლისს თავად დაამატებ და სასტარტო შემადგენლობის 6 წევრის გარეშე გიწევს თამაში, მოდი და ნუ წააგებ. მაშინაც კი, თუ მეტოქეს არანაკლები დანაკლისი აქვს.

სათამაშო ფორმა

“ბარსელონასი” არ იყოს, “დინამოსაც” არასტაბილურობა დასჩემდა. “კამპ ნოუზე” გმირულად ბრძოლისა და მხოლოდ ერთბურთიანი სხვაობით წაგებიდან 3 დღეში კიეველებმა დონეცკის “შახტარს” უმასპინძლეს და 0-3 განადგურდნენ. ეს მირჩა ლუჩესკუს გუნდისთვის უკრაინის ჩემპიონატში პირველი მარცხი იყო.

შემდეგ იყო სანაკრებო პაუზა, რასაც “დინამომ”ჩემპიონატში “ინგულეცთან” სტუმრად 2-0 მოგება მოაყოლა.

კიეველებს ბოლო 4 საშინაო თამაშში მხოლოდ 1 მოგება აქვთ.

“ბარსელონას” კი პრობლემები ყველა მიმართულებით აქვს. კატალონიელებს უკვე წლებია თამაში არ უვარგათ, რასაც ერნესტო ვალვერდეს გაგდების შემდეგ შედეგების გაუარესებაც მოჰყვა. სიტუაცია ვერც რონალდ კუმანმა გამოასწორა, რომლის გუნდმაც ლა ლიგის პირველ 8 ტურში მხოლოდ 11 ქულა აიღო, რაც ყველაზე ცუდი შედეგია იმ დროიდან მოყოლებული, კუმანი რომ “ბარსელონაში” თამაშობდა.

“ბარსას” ბოლო 4 გასვლითი თამაშიდან მხოლოდ ერთი აქვს მოგებული, ისიც ნახევარი შემადგენლობით მოთამაშე “იუვენტუსთან”.

დანაკლისი

“კამპ ნოუზე” გამართულ შეხვედრაში “დინამოს” არაერთი ფეხბურთელი კორონავირუსის გამო აკლდა. მათი ნაწილი გუნდს ახლახანს დაუბრუნდა, მაგრამ უკრაინელებს სხვა მოთამაშეები გამოაკლდნენ, მათ შორის “კამპ ნოუს” თამაშის გმირი, 18 წლის მეკარე რუსლან ნეშერეტი.

დღევანდელ შეხვედრაში უკრაინელებს ციგანკოვი, პოპოვი, როდრიგესი, სიროტა, ნეშერეტი, დეულანდი, შაბანოვი, ლედნევი, ანდრიევსკი, ტიმჩიკი, კოსტევიჩი და რუსინი არ ეყოლება, ხოლო სიდორჩუკის საკითხი გადაწყვეტილი ჯერ კიდევ არაა.

ფეხბურთის ქართველი გულშემატკივრებისთვის სასიხარულოდ, კორონავირუსისგან სრულად გამოჯანმრთელდა გიორგი წიტაიშვილი, რომელიც, შესაძლოა, დღეს მოედანზე ვიხილოთ.

ამ გუნდებს შორის გამართული წინა შეხვედრის შემდეგ საკადრო პრობლემები “ბარსელონასაც” მოუმრავლდა, თან როგორ. ჟერერ პიკე, სერხიო ბუსკეტსი, ანსუ ფატი, სერჟი რობერტო, რონალდ არაუხო, სამუელ უმტიტი – ასე გამოიყურება “ბარსელონას” ლაზარეთი. ამას კი კუმანმა ლიონელ მესი და ფრენკი დე იონგი დაუმატა. გუნდის ლიდერები დღეს დაისვენებენ.

“ბარსელონას” განაცხადი.

ურთიერთშეხვედრები

კიევის “დინამო” ის გუნდია, რომელთან ურთიერთშეხვედრების გახსენებაც “ბარსელონას” გულშემატკივრებისთვის დიდად ტკბილი მოგონება არაა.

სულ ჩატარებული 11 თამაშიდან “ბარსამ” 7 მოიგო, 1 ფრედ დაასრულა და 3 წააგო, გაიტანა 20 და გაუშვა 16 გოლი.

ცუდად მოსაგონარი კი “დინამოსთან” თამაშები ჩემპიონთა ლიგის 1997/98 წლების სეზონის გამოა. ეს გუნდები ერთმანეთს ჯგუფურ ეტაპზე შეხვდნენ. 22 ოქტომბერს, კიევში, მასპინძლებმა 3-0 მოიგეს. 5 ნოემბერს, როდესაც “ბარსელონა” შერცხვენის გამო რევანშს ელოდა, ანდრეი შევჩენკოსა (3) და სერგეი რებროვის გოლით, “დინამომ” “კამპ ნოუზე” 4-0 იმარჯვა.

მას შემდეგ, მიმდინარე სეზონამდე, გუნდები ერთმანეთს 2-ჯერ შეხვდნენ. ეს 2009 წელს, კვლავ ლიგის ჯგუფურ ეტაპზე მოხდა. ორივე თამაში ამჯერად “ბარსამ” მოიგო – შინ 2-0 და სტუმრად 2-1. გოლები მესიმ (2), პედრომ და ჩავიმ გაიტანეს. მესის გარდა, იმ “ბარსელონადან” გუნდში პიკე და ბუსკეტსი არიან შემორჩენილნი.

“ბარსელონას” უკრაინულ გუნდებთან სულ 20 თამაში აქვს ჩატარებული. კატალონიელებმა 13 მოიგეს, 2 ფრედ დაასრულეს და 5 წააგეს, გაიტანეს 38 და გაუშვეს 24 გოლი. სტუმრად ჩატარებულ 9 თამაშში “ბლაუგრანას” ასეთი ბალანსი აქვს – 5 მოგება, 1 ფრე, 3 მარცხი.

“დინამოს” ესპანურ მეტოქეებთან ჩატარებულ 28 თამაშში 5 მოგება, 10 ფრე, 13 წაგება, 33 გატანილი და 44 გაშვებული გოლი დაუგროვდა. კიევში გამართული 13 დაპირისპირებიდან კიეველებმა 3 მოიგეს, 5 ფრედ დაასრულეს და 5 წააგეს.

არბიტრი

შეხვედრას 40 წლის მატეი იუგი მოემსახურება.

სლოვენიელი არბიტრი “ბარსელონას” მატჩში პირველად იმსაჯებს. “დინამომ” კი მისი მონაწილეობით ჩატარებული ერთადერთი შეხვედრა ფრედ დაასრულა.

ვიდეორეფერი გერმანელი საშა შტეგემანი იქნება, რომელიც “ბარსელონასთვისაც” და “დინამოსთვისაც” ახალი სახეა.

სტატისტიკა

• “ბარსელონა” იმ 4 გუნდს შორის შედის, რომლებმაც ჩემპიონთა ლიგის მიმდინარე გათამაშებაში სამივე თამაში მოიგეს;
• ჩემპიონთა ლიგის მიმდინარე სეზონში ჩატარებულ სამივე მატჩში “ბარსელონამ” პირველი ტაიმიც მოიგო და თამაშიც;
• “ბარსელონას” ჩემპიონთა ლიგის ბოლო 5 თამაშში მინიმუმ 2 გოლი გაჰქონდა;
• “ბარსელონას” კიევის “დინამოსთან” ჩატარებული ბოლო 3 თამაში მოგებული აქვს;
• ჩემპიონთა ლიგის მიმდინარე გათამაშებაში ჩატარებულ სამივე შეხვედრაში “დინამომ” 2-2 გოლი გაუშვა;
• “ბარსელონას” ჩემპიონთა ლიგის ბოლო 24 თამაშში მხოლოდ 2 წაგება აქვს;
• “ბარსელონას” ჩემპიონთა ლიგის ბოლო 8 თამაშიდან 7-ში მინიმუმ 2 გოლი გაჰქონდა;
• “დინამოს” ესპანურ გუნდებთან ჩატარებულ ბოლო 13 თამაშში მოგება არ აქვს.

მწვრთნელების კომენტარები

რონალდ კუმანი

კუმანის კომენტარი სრულად.

მირჩა ლუჩესკუ

სავარაუდო შემადგენლობები

UEFA

დინამო: ბუშანი, კეძიორა, ზაბარნი, მიკოლენკო, კარავაევი, შაპარენკო, შეპელიევი, გარმაში, ბუიალსკი, დე პენა, სუპრიაგა.

ბარსელონა: ტერ შტეგენი, დესტი, ლანგლე, მინგესა, ალბა, პიანიჩი, ალენია, დემბელე, კოუტინიო, ტრინკაუ, გრიზმანი.

Whoscored

დინამო (4-4-1-1): ბუშანი, კეძიორა, ზაბარნი, მიკოლენკო, კარავაევი, წიტაიშვილი, ბუიალსკი, შეპელევი, დე პენა, გარმაში, სუპრიაგა.

ბარსელონა (4-2-3-1): ტერ შტეგენი, დესტი, მინგესა, ლანგლე, ალბა, პიანიჩი, ალენია, ტრინკაუ, კოუტინიო, პედრი, გრიზმანი.

Sportsmole

დინამო: ბუშანი, კეძიორა, ზაბარნი, მიკოლენკი, კარავაევი, შეპელევი, გარმაში, შაპარენკო, ბუიალსკი, დე პენა, სუპრიაგა.

ბარსელონა: ტერ შტეგენი, დესტი, მინგესა, ლანგლე, ალბა, პიანიჩი, ალენია, პედრი, კოუტინიო, დემბელე, გრიზმანი.

Sportskeeda

დინამო: ბუშანი, კარავაევი, მიკოლენკო, ზაბარნი, კეძიორა, გარმაში, შეპელევი, დე პენა, ბუიალსკი, შაპარენკო, სუპრიაგა.

ბარსელონა: ტერ შტეგენი, დესტი, მინგესა, ლანგლე, ალბა, პიანიჩი, პუჩი, ტრინკაუ, კოუტინიო, დემბელე, გრიზმანი.

პროგნოზი

• WhoScored: 1-2
• Sportsmole: 1-2
• Sportskeeda: 0-2
• Squawka: 0-2

ტრანსლაცია

შეხვედრა თბილისის დროით 23 საათსა და 55 წუთზე დაიწყება. მის პირდაპირ რეპორტაჟს სილქ სპორტ 2 და Silksport.ge გთავაზობთ.