“ბარსელონა” პოლ პოგბას უფასოდ დამატებას შეეცდება | MD

“ბარსელონა” რთულ ფინანსურ მდგომარეობაშია, რის გამოც მოსალოდნელია, რომ კატალონიური გუნდი, მომდევნო ზაფხულში, აქცენტს თავისუფალ აგენტებზე გააკეთებს. ასეთი მაღალი დონის ფეხბურთელი კი არაერთია.

ერთ-ერთი ვარსკვალვი, რომელსაც კონტრაქტი მიმდინარე სეზონის ბოლოს უმთავრდება, პოლ პოგბაა. Mundo Deportivo-ს ინფორმაციით, “ბარსელონა” “მანჩესტერ იუნაიტედის” 27 წლის ნახევარმცველის დამატების ვარიანტს განიხილავს.

კატალონიური გამოცემის მიერ ინფორმაციის გავრცელების მიუხედავად, პოგბას “ბარსელონაში” გადმოსვლა მაინც ნაკლებად სავარაუდოა, რასაც რამდენიმე მიზეზი აქვს: 1) ზაფხულში “ბარსელონას” ახალი პრეზიდენტი და დიდი ალბათობით ახალი დირექტორთა საბჭო ეყოლება და მოსალოდნელია, რომ კლუბის გეგმები მნიშვნელოვნად შეიცვალოს; 2) “ბარსელონას” სახელფასო ფონდის შემსუბუქება აქვს გადაწყვეტილი, პოგბას ტრანსფერი კი ამ პრობლემას პირიქით, გაართულებს; 3) “ბარსელონა” ნახევარმცველის დამატების აუცილებლობის წინაშე არ დგას; 4) პოგბა არ მალავს, რომ მისი ოცნება “რეალში” თამაშია, მადრიდულ გუნდს კი მისი თანამემამულე ზინედინ ზიდანი წვრთნის.

Mundo Deportivo “ბარსელონას” სხვა ისეთ ფეხბურთელებსაც უკავშირებს, რომლებსაც კონტრაქტი მიმდინარე სეზონის ბოლოს უმთავრდებათ: სერხიო აგუერო, დავიდ ალაბა, ანხელ დი მარია, ორიოლ რომეუ, ხუან ბერნატი, არკადიუშ მილიკი, ჯანლუიჯი დონარუმა.