მეხუთე “ელ კლასიკო” ჩემპიონთა ლიგაზე?

დღეს ჩემპიონთა ლიგის წილისყრა გაიმართა, სადაც “ბარსასა” და “რეალის” პოტენციური მეტოქეები გამოვლინდნენ.

შანსი საკმაოდ მცირეა, თუმცა, შესაძლებელია, ისტორიაში მეხუთედ, ჩემპიონთა ლიგის ნახევარფინალში “ელ კლასიკო” ვიხილოთ.

პირველ რიგში, კატალონიელებმა “ნაპოლის” ბარიერი უნდა დაძლიონ, რის შემდეგაც, მათ მეოთხედფინალში უდიდესი ალბათობით, მიუნხენის “ბაიერნთან” მოუწევთ შეხვედრა.

პირველი მატჩი, ანტუან გრიზმაანის გოლის წყალობით, “ბარსამ” ფრედ დაასრულა. ხოლო “რეკორდმაისტერმა” “სტემფორდ ბრიჯზე” “”ლურჯების”” განადგურების შემდეგ, ანგარიშით 3-0, მომდევნო ეტაპის საგზური პრაქტიკულად გაინაღდა.

მადრიდის “რეალის” გზა გაცილებით რთული იქნება. მათ ჯერ “სანტიაგო ბერნაბეუზე” 1-2 მარცხის აღმოფხვრა უნდა შეძლონ, ხოლო შემდეგ “იუვენტუსსა” და “ლიონს” შორის გამარჯვებულს უნდა შეხვდნენ.

თუ ყველაფერი აღნიშნული გეგმის მიხედვით წარიმართა, 2019/20 წლების სეზონის ჩემპიონთა ლიგის ნახევარფინალში, “ბარსა” და “რეალი” ერთმანეთს კიდევ ერთხელ დაუპირისპირდებიან.

მოსისხლე მტრების გზები ევროპის საკლუბო ჩემპიონატზე აქამდე 4-ჯერ გადაიკვეთა (1959/60, 1960/61, 2001/02, 2010/11).

უკანაკსნელად, 2011 წელს “ბლაუგრანამ” “რეალი” ორი მატჩის ჯამში 3-1 დაამარცხა და საბოლოოდ ჩემპიონის ტიტული დაისაკუთრა.