არეული ხუთი წლის შემდეგ, არდა თურანი “ბარსელონას” საბოლოოდ ტოვებს

33 წლის თურქ ნახევარმცველს, არდა თურანს, “ბარსელონასთან” კონტრაქტი ამოეწურა. კატალონიის დედაქალაქში ჩატარებული ბოლო სეზონის შემდეგ, თურანი მშობლიურ თურქეთში, “ბაშაქშეჰირის” ღირსებას იცავდა. 

ამჟამად ფეხბურთელი თავისუფალია, დადის ჭორები, რომ ის, შესაძლოა, თავის პირველ კლუბში – “გალათასარაიში” დაბრუნდეს. თურანი “ბარსელონას” 2015 წელს მადრიდის “ატლეტიკოდან” შეუერთდა, კატალონიელებმა მის ტრანსფერში 34 მილიონი ევრო გადაიხადეს. 

ზემოთხსენებულ პერიოდში “ბარსელონას” ახალი მოთამაშეების დარეგისტრირების უფლება არ ჰქონდა, სწორედ ამიტომ, თურქ ნახევარმცველს სეზონის დიდი ნაწილი გაუცდა. 

2018 წლის იანვარში, არდა თურქეთში დაბრუნდა, “ბაშაქშეჰირმა” იგი ორი წლით დაიმატა, თუმცა ყველაფერი არცთუ ისე კარგად აეწყო. იმავე წლის მაისში მოთამაშემ არბიტრის ხელისკვრის გამო 16 მატჩიანი დისკვალიფიკაცია მიიღო, მოგვიანებით კი მორიგ კრიმინალურ სკანდალშიც გაეხვა. 

არდა თურანის მონაგარი “ბარსელონაში” ასეთია – ლა ლიგა (2015/2016), ესპანეთის თასი 2x (2015/2016, 2016/2017) და ესპანეთის სუპერ თასი (2016), ნახევარმცველმა “ლურჯ-ბროწეულისფერთა” მაისური 55-ჯერ მოირგო და მეტოქის კარში 15 გოლი გაიტანა.