წარმოგიდგენთ რუბრიკას “ფოკუსს მიღმა”. ამ რუბრიკაში შემოგთავაზებთ დღევანდელ სიახლეებს, რომლებიც ჩვენი ფოკუსის მიღმა ნაკლები მნიშვნელობის გამო დარჩა და რომლებსაც ცალკე სტატია არ მიეძღვნა.
გუსტავო მაია
“ბარსელონამ” “სან პაულოს” შემტევში 1 მილიონი ევრო უკვე გადაიხადა. 19 წლის ფეხბურთელის აგენტის, დანილო სილვას განცხადებით, “ბლაუგრანა” დარჩენილ 3.5 მილიონსაც გადაიხდის და ტრანსფერი სრულად შედგება. ბრაზილიური კლუბის დირექტორი ალექსანდრე პასარო კატალონიელებს ვადას 30 ივნისამდე აძლევს. [Goal]
ნეიმარი
“პარი სენ-ჟერმენი” 28 წლის ბრაზილიელის სანაცვლოდ “ბარსელონასგან” 175 მილიონ ევროს ითხოვს. პარიზელებს ტრანსფერში სხვა ფეხბურთელების ჩართვა არ სურთ. [Sport]
უსმან დემბელე
უსმან დემბელე “იუვენტუსს” კიდევ უფრო მიუახლოვდა. ტურინელებს მისი წაყვანა იჯარის წესით სურთ. “ბებერი ქალბატონის” ტრანსფერების მენეჯერს ფრანგი ძალიან მოსწონს და მის აგენტთანაც შესანიშნავი ურთიერთობა აქვს. [Mundo Deportivo]
სერჟინიო დესტი
“პარი სენ-ჟერმენი” “ბარსელონას” ერთ-ერთ პრიორიტეტულ სამიზნეს, სერჟინიო დესტს რამდენიმე დღეში ოფიციალურ შეთავაზებას გაუკეთებს. [Mundo Deportivo]
ლაუტარო მარტინესი
“ინტერის” ყოფილი პრეზიდენტი, მასიმო მორატი აცხადებს: “ნერაძური” ლაუტაროს შენარჩუნებას ცდილობს. მას დიდი პოტენციალი აქვს, თუმცა ყველაფერი მის სურვილსა და “ბარსას” შეთავაზებაზეა დამოკიდებული. მარტნესი იტალიაში ბედნიერია, თუმცა ლეო მესისთან ერთად თამაშის პერსპექტივა ყოველთვის მოტივაციაა”. [Radio Catalunya]
ერნან კრესპო
ყოფილი არგენტინელი ფეხბურთელი, ერნან კრესპო თანამემამულეზე საუბრობს: “მინდა, ლაუტარო “ინტერში” დარჩეს, რადგან ის ძირითადი შემადგენლობის წევრი 1 წლის წინ გახდა და მეტი საფუძველი სჭირდება. მარტინესი სრულყოფილი მოთამაშეა, რომელიც სერიოზული და საქმეზე ფოკუსირებული ბიჭი გახლავთ”. [Goal]
