რატომ უნდა შეიძინოს “ბარსამ” ედუარდო კამავინგა – 4 მიზეზი

გუშინ მადრიდულმა AS-მა გაავრცელა ინფორმაცია, “ბარსელონა” ფრანგული “რენის” ამომავალი ვარსკვლავით, ედუარდო კამავინგათი ინტერესდება და მისთვის ბრძოლაში მადრიდის “რეალს” გაეჯიბრება.

Tribuna გვთავაზობს 4 მიზეზს იმისა, თუ რატომ უნდა დაიმატოს “ბლაუგრანამ” 17 წლის ფეხბურთელი:

1. უნივერსალური ნახევარმცველი

კამავინგა, შესაძლოა, ნომინალური ნახევარმცველია, მაგრამ ეს სულაც არ ნიშნავს იმას, რომ მას მხოლოდ ბურთის დაჭერა და საჯარიმომდე მიტანა შეუძლია. პირიქით, 17 წლის ანგოლელი სხვა თვისბებითაც გამოირჩევა. მაგალითისთვის შეგვიძლია მოვიყვანოთ მისი სტატისტიკა “მონპელიესთან” წინააღმდეგ მატჩში:

• 100% წარმატებული დრიბლინგი
• 100% გრძელი პასის სიზუსტე
• 97% წინ გაკეთებული პასის სიზუსტე
• 97% პასის სიზუსტე
• 4 დაბრუნებული ბურთი
• 2 საგოლე მომენტის შექმნა
• 2 მოგებული ორთაბრძოლა
• 1 მოპოვებული ჯარიმა
• 1 საგოლე გადაცემა

ახალგაზრდა ფეხბურთელი ძალიან კარგად გამოიყურება ბურთით და მის გარეშეც. გარდა ამისა, ის ეფექტურია პრესინგის დროს. ეს ისაა, რაც ზუსტად კიკე სეტიენს სჭირდება.

2. უფრო გამოცდილი, ვიდრე წარმოგიდგენიათ

21-წლამდელთა საფრანგეთის ნაკრების ფეხბურთელს მოედანზე უფრო მეტი დრო გაუტარებია, ვიდრე მოელოდით. მიუხედავად იმისა, რომ კამავინგა ნოემბერში ჯერ მხოლოდ 17 წლის გახდა, მის ანგარიშზე უკვე 36 მატჩია, რომელთაგან უმეტესობა მან სრულად ჩაატარა.

ფაქტობრივად, ედუარდო ერთ-ერთი ყველაზე ახალგაზრდა ფეხბურთელია, რომელსაც მოედანზე ყველაზე მეტი დრო გაუტარებია. საერთო ჯამში, მან 2783 წუთი ითამაშა, რაც მისი ასაკისთვის საკმაოდ გასაოცარი შედეგია.

3. კამავინგა, ჯერჯერობით, შედარებით იაფია

ედუარდო, Transfermarkt-ის მიხედვით, ყველაზე ძვირადღირებულ 17-წლამდე ფეხბურთელთა სიაში პირველ ადგილს იკავებს. მისი სატრანსფერო ღირებულება 42 მილიონ ევროს შეადგენს. თუ ნიჭიერი ნახევარმცველი მომავალ სეზონშიც ასეთ დონეზე თამაშს გააგრძელებს, მისი ფასი გაიზრდება. ესაა მიზეზი იმისა, თუ რატომ უნდა იმოქმედოს კატალონიურმა კლუბმა სწრაფად.

აღსანიშნავია, რომ კამავინგა ანსუ ფატიზე მხოლოდ 2 მილიონით ძვირი ღირს. თუ “ბარსელონამ” ახალგაზრდა შუახაზელი დაიმატა, კლუბს მსოფლიოს 2 ყველაზე ნიჭიერი ფეხბურთელი ეყოლება.

4. “რეალთან” ბრძოლის მოგება

კამავინგასთვის, რა თქმა უნდა, “სამეფო კლუბიც” იბრძვის. ივარაუდება, რომ მადრიდელები “ბლაუგრანას” დიდ კონკურენციას გაუწევენ. კატალონიელებმა ანგოლელი ფეხბურთელი “რეალს” არ უნდა დაუთმონ.

“ბარსამ” უკვე დაკარგა ისეთი ნახევარმცველები, როგორებიც ლუკა მოდრიჩი და ისკო არიან, რომლებიც კატალონიურ გუნდს ბევრად უფრო უკეთ მოერგებოდნენ, ვიდრე “რეალს”. “ბლაუგრანამ” იგივე შეცდომა აღარ უნდა დაუშვას.