“ბარსელონამ” “ბეტისი” სტუმრად დაამარცხა – “რეალთან” ჩამორჩენა ისევ 3 ქულაა

“ბარსელონამ” ესპანეთის ჩემპიონატის 23-ე ტურის მატჩი სტუმრად, “ბეტისთან” გამართა. 

პირველ ტაიმში კიკე სეტიენის გუნდი ორჯერ მარცხდებოდა: მე-6 წუთზე ანგარიში სერხიო კანალესმა პენალტით გახსნა, რასაც სამ წუთში ფრენკი დე იონგმა უპასუხა. 26-ე წუთზე ნაბილ ფეკირმა “ბეტისი” კიდევ ერთხელ დააწინაურა, ტაიმის ბოლოს კი სერხიო ბუსკეტსმა წონასწორობა ისევ აღადგინა.

მეორე ტაიმში გარდამტეხი უპირატესობა “ბარსამ” მოიპოვა და ერთადერთი გოლი კლემან ლანგლემ გაიტანა, ლიონელ მესიმ კი მესამე ასისტი შეასრულა. თამაში 2-3 დასრულდა. 

აღსანიშნავია, რომ ბოლო 15 წუთის განმავლობაში ორივე გუნდი მოედანზე 10 ფეხბურთელით იყო: მსაჯმა მოედნიდან 5-წუთიან მონაკვეთში ლანგლე და ნაბილ ფეკირი გააძევა. 

“ბარსელონას” 49 ქულა აქვს და სატურნირო ცხრილში პირველ ადგილზე მყოფ მადრიდის “რეალს”, რომელმაც ამ ტურში “ოსასუნას” 4-1 მოუგო, 3 ქულით ჩამორჩება. კატალონიელები მომდევნო ტურში “ხეტაფეს” შეხვდებიან – მატჩი 15 თებერვალს, “კამპ ნოუზე” ჩატარდება.