ბარსელონას მაისის თვის კალენდარი

სეზონის ბოლო თვე იწყება. მაისში 2025/26 წლების სეზონი დასრულდება. ეს თვე “ბარსელონასთვის” გადამწყვეტია, რადგან კლუბს მკაფიო მიზანი აქვს – ლა ლიგის თასის აღმართვა. “ბლაუგრანას” უახლოეს მდევართან “რეალ მადრიდთან” 11-ქულიანი უპირატესობა აქვს, წინ კი 5 ტურია დარჩენილი.

“ოსასუნასთან” სტუმრად

“ბარსელონას” თვის რთული დასაწყისი და “ოსასუნასთან” გასვლითი მატჩი ელის. “ელ სადარი” პოტენციური ტიტულის მოსაპოვებლად პირველი გაჩერებაა. ჰანსი ფლიკის გუნდი პამლონელებს შაბათს, 2 მაისს, 23:00 საათზე ესტუმრება. “ბლაუგრანასთვის” 3 ქულის მოპოვება მნიშვნელოვანია, რადგან არის შანსი, “ბარსამ” ჩემპიონობა კვირასვე გაინაღდოს, თუ “რეალ მადრიდი” “ესპანიოლთან” დამარცხდება.

“ელ კლასიკოს” შედეგმა, შესაძლოა, ლა ლიგის ბედი გადაწყვიტოს

თუ ესპანეთის ჩემპიონის საკითხი ამ კვირაშივე არ გაირკვევა, “ბლაუგრანელების” ბედი საკუთარ ხელში იქნება. 10 მაისს 23:00 საათზე ჩანიშნულ საშინაო “ელ კლასიკოში” სასწორზე 3 ქულაზე ბევრად მეტი რამ დევს, რადგან დადებითი შედეგის შემთხვევაში “ბარსელონა” ლა ლიგის მორიგ ტიტულს ოფიციალურად გაიფორმებს.

ბოლო 3 მატჩი

“კლასიკოდან” 3 დღეში, 13 მაისს, 23 საათსა და 30 წუთზე, “ბარსა” “ალავესს” სტუმრად დაუპირისპირდება. 16/17 მაისს სეზონის ბოლო საშინაო შეხვედრაში “ბლაუგრანა” “ბეტისს” უმასპინძლებს. კატალონიური გუნდი სეზონს 23/24 მაისს “მესტალიაზე” “ვალენსიასთან” გასვლითი მატჩით დახურავს.