ესპანეთის თასზე “ბარსელონას” პირველი მეტოქე ხვალ გაირკვევა

ხვალ გასამართ ესპანეთის თასის წილისყრაზე ამ ტურნირის 1/16-ფინალში “ბარსელონას” მეტოქე გამოვლინდება.

ცნობილია ის 8 გუნდი, რომლებიც “ბარსელონას” პოტენციური მეტოქეები არიან – “ბადალონა”, “ბადახოსი”, “კულტურალ ლეონესა”, “ებრო”, “იბისა”, “რეკრეატივო”, “ლოგრონიესი” და “სალამანკა.”

ახალი ფორმატის მიხედვით, 1/2-ფინალამდე ყველა დაპირისპირება ერთმატჩიანია, რომელიც ქვედა ლიგაში მოთამაშე გუნდის სტადიონზე იმართება. ეს ნიშნავს, რომ “ბარსელონა” ზემოთ ჩამოთვლილ რომელიმე გუნდთან სტუმრად ერთ შეხვედრას გამართავს.

“ბარსელონასთვის” ყველაზე კარგი ვარიანტი “ბადალონაა”, რომლის სტადიონიც “კამპ ნოუდან” მხოლოდ 18 კილომეტრითაა დაშორებული.

ესპანეთის სამეფო თასის 1/16-ფინალის თამაშები 21-23 იანვარს გაიმართება.

წილისყრა თბილისის დროით 15:00 საათზე დაიწყება.