“ბარსელონამ” სეზონი “ჩელსისთან” მარცხით დაიწყო

ოფიციალური სეზონისთვის მოსამზადებელ ამხანაგურ მატჩებს “ბარსელონა” იაპონიაში მართავს. კატალონიური გუნდი “საიტამა სთედიუმზე” ლონდონის “ჩელსის” დაუპირისპირდა. 

“ბარსა” აზიაში ლიონელ მესის გარეშე იმყოფება, რაც დღევანდელ თამაშს ძალიან დაეტყო. 

ესპანეთის მოქმედი ჩემპიონი კომპონენტების უმეტესობაში უპირატესობას ფლობდა, მაგრამ მათ მომენტების გამოყენება ვერ მოახერხეს. პირველ ტაიმში ერთადერთი გოლი გავიდა – 34-ე წუთზე, მარკ-ანდრე ტერ შტეგენმა ტამი ებრემის დარტყმა ვერ მოიგერია. 

მატჩის დასრულებამდე 10 წუთით ადრე როს ბარკლიმ “ჩელსის” უპირატესობა ორამდე გაზარდა, დამატებულ დროში კი ივან რაკიტიჩმა საჯარიმოს გარედან ლამაზი დარტყმით სხვაობა შეამცირა. 

შეხვედრაში “ბარსელონას” სამივე ახალწვეულის დებიუტი შედგა – ანტუან გრიზმანი ძირითად შემადგენლობაში იყო და პირველი ტაიმი ითამაშა. ფრენკი დე იონგი და ნეტუ მოედანზე შესვენების შემდეგ გავიდნენ. 

მომდევნო ამხანაგურ მატჩს “ბარსა” “ვისელ კობეს” წინააღმდეგ, 27 ივლისს გამართავს.