10 რამ, რაც ანტუან გრიზმანის შესახებ უნდა ვიცოდეთ

დღეს ოფიციალურად დადასტურდა, რომ 28 წლის ფრანგი ვარსკვლავი ანტუან გრიზმანი კარიერას “ბარსელონაში” განაგრძობს.

კატალონიური კლუბის ვებგვერდი გვთავაზობს 10 ფაქტს, რომლებიც ანტუან გრიზმანის შესახებ უნდა ვიცოდეთ.

1. კავშირი ანტუან დე სენტ-ეგზიუპერთან

საქვეყნოდ ცნობილ მწერალთან გრიზმანს მხოლოდ სახელი არ აკავშირებს. ფრანგი ფეხბურთელის მეტსახელი (“პატარა პრინცი”) ეგზიუპერის ყველაზე ცნობილი ნაწარმოებიდან მოდის. გრიზმანის ერთ-ერთ ტატუზე კი ვკითხულობთ ეგზიუპერის ცნობილ ფრაზას: “აქცია ცხოვრება ოცნებად და ოცნება რეალობად.”

2. პორტუგალიიდან მაკონში

“ბარსელონას” ისტორიაში მე-20 ფრანგი ფეხბურთელი საფრანგეთის ქალაქ მაკონში დაიბადა, მაგრამ მისი ფესვები პორტუგალიიდან მოდის. მისი დედის მამამ, ამარო ლოპესმა, პორტუგალიაში პროფესიონალი ფეხბურთელობა მიატოვა და საფრანგეთში გადაბარგდა, სადაც მშენებლობაზე მუშად მუშაობდა.

3. რთული დასაწყისი

გრიზმანის პირველი გუნდი მაკონიდან იყო და ერქვა “შარნაი ლე მაკონი”. ეს გუნდი, მოგვიანებით, საფეხბურთო კლუბ “მაკონს” შეუერთდა და შეიქმნა ახალი კლუბი “საფეხბურთო გაერთიანება მაკონეზი”.

ანტუანის პროგრესი აშკარა და შეუქცევადი იყო. მან არაერთი ფრანგული გუნდის ყურადღება მიიქცია. “ოსერი”, “ლიონი”, “სოშო”, “სენტ-ეტიენი”, “მეცი” და “მონპელიე” მას სინჯებზე ეპატიჟებოდნენ. თუმცა, სიდაბლის გამო, ის ყველა აკადემიაში დაიწუნეს.

როდესაც გრიზმანი 13 წლის იყო მან ესპანური “რეალ სოსიედადის” ყურადღება მიიქცია. ის მშობლიური ქალაქიდან ბაიონაში გადაბარგდა ერიკ ოლატსთან ერთად, რომელმაც ის აღმოაჩინა. სწორედ “სოსიედადში” გაიბრწყინა გრიზმანმა პირველად.

4. “ბლაუგრანა” მაისური

მაკონში ყოფნის დროს, ადგილობრივ გუნდში, გრიზმანი “ლურჯ-წითელი” მაისურით თამაშობდა.

5. ოცნება მეკარეობაზე

გრიზმანს არა მხოლოდ გოლების გატანა, არამედ მათი მოგერიებაც მოსწონდა. ბავშოვბაში მას ხელთათმანების გაკეთება და კარში დგომა უყვარდა. ვარჯიშის დასრულების შემდეგ ის სწორედ ამას აკეთებდა.

6. კალათბურთის სიყვარული

ანტუან გრიზმანი NBA-ს დიდი მოყვარულია. მისი ფავორიტი კალათბურთელი დერეკ როუზია. გრიზმანის სახლს მადრიდში საკალათბურთო მოედანიც აქვს.

7. დებიუტი დიდ ეკრანზე

ანტუან გრიზმანმა The Lego Batman Movie-ს ფრანგულ ვერსიაში სუპერმენი გაახმოვანა.

8. სონი ანდერსონი – ანტუანის ერთ-ერთი საყვარელი ფეხბურთელი

ბავშვობაში, მისი თანატოლების უმრავლესობის მსგავსად, გრიზმანსაც სურდა მისი კუმირის ავტოგრაფი მოეპოვებინა. ის სონი ანდერსონით იყო მოხიბლული, რომელიც საფრანგეთში სათამაშოდ “ბარსელონადან” გადავიდა.

9. ავტომობილი და “ოქროს ბურთი”

2016 წელს, ანტუან გრიზმანმა ავტომობილის მართვის დროს შეიტყო, რომ ის მსოფლიოს წლის საუკეთესო სამ ფეხბურთელს შორის მოხვდა. ის შოკირებული იყო და თავსი დასა და აგენტს არ უჯერებდა. ანტუანს ეს ყველაფერი ხუმრობა ეგონა.

10. მატე

გრიზმანს ურუგვაული კულტურა და სასმელი მატე უყვარს. ურუგვაელი, რომელმაც ანტუანს მატე გაასინჯა, კარლოს ბუენო იყო, რომელთან ერთადაც ის “სოსიედადში” თამაშობდა. ახლა, მას შეუძლია მატე ორ სამხრეთ ამერიკელთან და ამ სასმლის დიდ მოყვარულთან, ლეო მესისთან და ლუის სუარესთან ერთად მიირთვას.