რამდენიმე საათში “ბარსას” 4 ფეხბურთელი დატოვებს

4 ფეხბურთელი, რომლებიც ამ ეტაპისთვის “ბარსელონაში” ირიცხებიან, რამდენიმე საათში, კატალონიურ კლუბს დატოვებს. საუბარია იმ მოთამაშეებზე, რომლებსაც კონტრაქტი უმთავრდებათ.

ტომას ვერმალენი

ვეტერანი ცენტრალური მცველი “ბარსელონაში” 2014 წლიდან ირიცხება. გასული 4 წლის განმავლობაში მან მონაწილეობა მხოლოდ 53 თამაშში მიიღო, რისი მიზეზიც ტრავმებია.

ჯერჯერობით უცნობია, სან განაგრძობს კარიერას ვერმალენი.

დუგლასი

ალბათ “ბარსელონას” ბევრს გულშემატკივარს ეგონა, რომ კატალონიურმა კლუბმა გაურკვეველი ტრანსფერის შედეგად “ბლაუგრანაში” გადმობარგებული ფეხბურთელი დიდი ხანია მოიშორა, მაგრამ ასე არაა. დუგლასი ისევ “ბარსელონას” საკუთრებაა, მაგრამ ხვალიდან აღარ იქნება.

დუგლასი, რომელიც ამჟამად 28 წლისაა, “ბარსელონამ” 2014 წელს, 4 მილიონ ევროდ, გაგიკვირდებათ და დანი ალვესის შემცვლელად დაიმატა. მის აქტივში 8 თამაში და 5 მოგებული ტიტულია.

უცნობია, სად განაგრძობს დუგლასი თამაშს.

კევინ პრინს ბოატენგი

კიდევ ერთი გაუგებარი ტრანსფერი. განელი თავდამსხმელი “ბარსელონაში” გასულ იანვარში, იჯარით გადავიდა. ტრანსფერის მიზანი ის იყო, რომ მას ლუის სუარესისთვის დასვენების საშუალება მიეცა ხოლმე. 32 წლის ფეხბურთელის აქტივში 4 თამაში და 0 გოლია.

ის “სასუოლოში” ბრუნდება.

ხეისონ მურილიო

ბოატენგის მსგავსად, მურილიოც იანვარში იჯარით მოვიდა და მის ტრანსფერსაც წარუმატებელი ეთქმის. მხოლოდ 4 თამაში და არაფერი სასარგებლო “ბარსასთვის”.

კოლუმბიელი ფეხბურთელი “ვალენსიაში” ბრუნდება.