ვინ უნდა შეცვალოს ერნესტო ვალვერდე?

ჯერჯერობით ერნესტო ვალვერდეს კატალონიურ კარიერას დასასრული არ უჩანს, თუმცა ესპანური პრესა აქტიურად წერს მისი შესაძლო გათავისუფლების შესახებ.

პრეზიდენტი ბართომეუ კი, საპირისპიროდ, სრულ ნდობას უცხადებს გუნდის მთავარ მწვრთნელს და აცხადებს, რომ კონტრაქტის ამოწურვამდე იგი კლუბს არ დატოვებს.

ვალვერდეს გათავისუფლების შემთხვევაში “ბარსელონას” რამდენიმე კანდიდატი ეყოლება:

1. ერიკ ტენ ჰაგი
49 წლის ჰოლანდიელი სპეციალისტი ფეხბურთელობის დროს ცენტრალური მცველი გახლდათ. იგი “ბაიერნში” პეპ გვარდიოლასთან ერთად მუშაობდა, პეპის ხელწერა აშკარად ეტყობა ტენ ჰაგის გუნდს, ჰოლანდიელი მიუნხენელთა სარეზერვო გუნდს წვრთნიდა.

ტენ ჰაგის “აიაქსმა” მიმდინარე სეზონში საოცრებათა სერია შემოგვთავაზა, ითამაშა ძალიან მიმზიდველი და ევროპაში ყველაზე ლამაზი ფეხბურთი, გავიდა ჩემპიონთა ლიგის 1/2 ფინალში, სადაც ბოლო წამს ლუკას მოურამ ამსტერდამული ზღაპარი დაასრულა.

ტენ ჰაგის “აიაქსმა” ტურნირიდან 3-გზის მოქმედი ჩემპიონი, მადრიდის “რეალი” და ერთ-ერთი მთავარი ფავორიტი ტურინის “იუვენტუსი” გამოთიშა, მოიგო ჰოლანდიის ჩემპიონატი და თასი.

და ბოლოს, რაც მთავარია ტენ ჰაგი თამაშობდა ზუსტად იმ ფეხბურთს, როგორსაც “ბარსელონა” უნდა თამაშობდეს. “აიაქსმა” აჩვენა ის თამაში, რომელიც ყველაზე ახლოს სწორედ კატალონიელებთანაა და მათგან ვართ მიჩვეული.

2. რონალდ კუმანი
“ბარსელონას” ლეგენდარული ცენტრალური მცველი და კატალონიელთათვის, ევროსარბიელზე, პირველი საჩემპიონო გოლის ავტორი ახლა სათავეში ჰოლანდიის ეროვნულ ნაკრებს უდგას. ყველაზე აქტიურად სწორედ იგი განიხილება ერნესტო ვალვერდეს შემცვლელად.

კუმანი ბოლო პერიოდში ინგლისის პერმიერ ლიგაში მუშაობდა, სადაც “საუთჰემპტონისა” და “ევერტონის” გაწვრთნა მოასწრო. ჰოლანდიელ სპეციალისტს ჯერჯერობით სამწვრთნელო კარიერაში ისეთი არაფერი გაუკეთებია, რომ ჩვენთვის თავი დაემახსოვრებინა. ეროვნული გუნდი მან 2018 წელს ჩაიბარა.

3. კიკე სეტიენი
ზემოთ ხსენებულ მწვრთნელებთან ერთად კიკე სეტიენიც აქტიურად განიხილება კატალონიელთა მომავალ დამრიგებლად, ესპანელმა სპეციალისტმა მიმდინარე სეზონის დასრულების შემდეგ “რეალ ბეტისი” დატოვა.

კიკე სეტიენს სევილიურ კლუბში გასული სეზონი ბევრად უფრო კარგი ჰქონდა. მიმდინარე სეზონის პირველ წრეშიც კარგად გამოიყურებოდა მისი “ბეტისი”, “კამპ ნოუზე” დაამარცხა რა კატალონიის “ბარსელონა”, 4-3. მეორე წრე არც თუ ისე წარმატებული გამოუვიდა და, საბოლოოდ, “ბენიტო ვილიამარინიც” დატოვა. იგი იოჰან კრუიფის ფეხბურთის გულშემატკივარია და თავს ჰოლანდიელის ფილოსოფიის მიმდევრად თვლის.

4. მაქსიმილიანო ალეგრი
უკვე ოფიციალურად დადასტურებულია, რომ მაქსიმილიანო ალეგრისთვის მიმდინარე სეზონი ტურინის “იუვენტუსში” ბოლო იყო, ამის შემდეგ პრესამ იგი “ბარსელონას” დაუკავშირა, რამაც კატალონიელთა გულშემატკივრებში დიდი უკმაყოფილება გამოიწვია.

ცხადია, მაქსიმილიანო ალეგრი არ თამაშობს იმ ფეხბურთს, რომელსაც “ბარსელონა” უნდა თამაშობდეს, იგივე შეგვიძლია ვთქვათ ერნესტო ვალვერდეზეც. ყველაფერის მიუხედავად, არაა გამორიცხული, იტალიელი სპეციალისტი მომდევნო სეზონში “ბლაუგრანას” დამრიგებლად მოგვევლინოს.

5. არსენ ვენგერი
ლეგენდარული ფრანგი სპეციალისტი, რომელმაც თავისი საყვარელი ლონდონის “არსენალი” წინა სეზონის ბოლოს დატოვა. არსენ ვენგერის მიღწევები ყველამ ძალიან კარგად ვიცით და მისი “მეთოფეები”, რომლებიც ძალიან ლამაზ ფეხბურთს თამაშობდნენ.

მისი სათამაშო სტილის გამო “ბარსელონას” ისიც დაუკავშირეს, თუმცა, შესაძლოა, ფრანგის სამწვრთნელო კარიერა უკვე დასრულდა.

6. პეპ გვარდიოლა
“ბარსელონას” გულშემატკივრებისთვის ყველაზე საყვარელი სპეციალისტი, კატალონიური კლუბის ლეგენდარული ფეხბურთელი და მწვრთნელი, პეპ გვარდიოლა, რომელიც ამჟამად “მანჩესტერ სიტის” წვრთნის.

ძალიან დაბალია იმის შანსი, რომ კატალონიელმა სპეციალისტმა “ეტიჰადი” დატოვოს, თუმცა ბოლო დროს გავრცელებული ინფორმაციის თანახმად, “სიტი” ფინანსური ფეირ პლეის დარღვევის გამო, შესაძლოა, ჩემპიონთა ლიგიდან მოკვეთონ, რაც პეპის წასვლის შანსებს ზრდის. მიმდინარე სეზონში მან ინგლისში ყველაფერი მოიგო, რაც კი შესაძლებელი იყო. კატალონიელს ტურინის “იუვენტუსი” ეპატიჟება. მისი “ბარსელონაში” დაბრუნების შანსი ძალიან დაბალია, თუმცა ვინ იცის…

და ბოლოს, “ეს არის, რაც არის”…