როგორ შეიპარა მიმტანად გადაცმული ჟოან გასპარი სასტუმროში რონალდოსთან კონტრაქტის გასაფორმებლად

“ფენომენმა” “ბარსელონას” რიგებში მხოლოდ ერთი წელი გაატარა, მაგრამ ბრაზილიელი თავდამსხმელი რომ აქ საერთოდ მოხვდა, კლუბის ყოფილი პრეზიდენტის იმ დროს კი – აგენტის, ჟოან გასპარის დამსახურებაა. გასპარმა ახლახანს გაიხსენა, რა გზით მოახერხა რონალდოს გაფორმება, როცა ტრანსფერის განხორციელებისთვის დრო პრაქტიკულად აღარ ჰქონდა. 

“პსვ-სთან შეთანხმებას ჰქონდა პუნქტი, რომლის მიხედვითაც, თუ რონალდოს გარკვეულ დრომდე არ გავიფორმებდით, ტრანსფერი უქმდებოდა. დღეები გადიოდა, ფეხბურთელის წარმომადგენლებისგან არაფერი ისმოდა, ბოლოს კი პრეზიდენტმა გადაწყვიტა, მაიამიში გავეშვი, სადაც რონალდო ბრაზილიის ნაკრებთან ერთად იმყოფებოდა. 

იქ ჩავედი, მაგრამ რონალდოს ნახვას ადვილად ვერ მოვახერხებდი. სასტუმროში, სადაც ფეხბურთელები ისვენებდნენ, მკაცრად იყვნენ გაფრთხილებულნი, რომ უცხო არავინ შეეშვათ. თითქოს შანსი არ მქონდა, მაგრამ თავში ერთი იდეა მომივიდა. 

სასტუმროს ერთ-ერთი მიმტანი გავაჩერე და ტანსაცმლის გაცვლაზე დავიყოლიე. მისი ბაფთა და მოსაცმელი მოვირგე, თანაც კოკა-კოლა ავიღე თავისი დასადებით და ლიფტით იმ სართულზე ავედი, რომელშიც რონალდო უნდა ყოფილიყო. რა თქმა უნდა, მცველები დამხვდნენ, მაგრამ მათ ვუთხარი, რომ ფეხბურთელისთვის სასმელი მიმქონდა და გზა პირდაპირ განვაგრძე. 

რონალდოსთან მოვხვდი და ჩემი ნამდვილი ვინაობა გავანდე. მან თავის აგენტს დაურეკა, ესაუბრა და ბოლოს გადავწყვიტეთ, ყველაფერი იქვე მოგვეგვარებინა. ხელშეკრულება სასტუმროშივე, მის საწოლზე გაფორმდა და ის “ბარსელონას” ფეხბურთელი გახდა”. 

ეს 1996 წელს მოხდა. რონალდომ “ბარსა” ერთი სეზონის შემდეგ დატოვა, გასპარი კი 2000 წელს კლუბის პრეზიდენტად აირჩიეს. ის ამ პოსტზე 2003 წლამდე მუშაობდა, შემდეგ კი “ბლაუგრანას” სათავეში ჟოან ლაპორტა ჩაუდგა.