“ატლეტიკო” “ბარსელონასთან” მოლაპარაკების გამართვას არ აპირებს

მარდიდის “ატლეტიკოს” პრეზიდენტი ენრიკე სერესო აცხადებს, რომ ის “ბარსელონასთან” მოლაპარაკებებს არ აპირებს და ანტუან გრიზმანის ხელში ჩასაგდებად კატალონიელებს ფეხბურთელის გამოსასყიდი თანხის გადახდა მოუწევთ.

“გრიზმანით იმედგაცრუებული ვარ. ვფიქრობდი, რომ მას “ატლეტიკოში” დიდი მომავალი ჰქონდა და მნიშვნელოვან ტიტულებს მოიგებდა. პრობლემა კი ისაა, რომ ყველა თავისებურად ფიქრობს. მე და “ატლეტიკოს” გულშემატკივრები მის გადაწყვეტილებას პატივს ვცემთ და ფეხბურთელს წარმატებებს ვუსურვებთ. ერთნი მიდიან, მეორენი კი მოდიან. არ ვიცი, სად გააგრძელებს ის კარიერას, თავად მას ჰკითხეთ. მას შეუძლია ითამაშოს იქ, სადაც მოუნდება.

ეს, ჩვენთვის, სიურპრიზი იყო. იმედგაცრუებულები ვართ. მე რომ მისი მრჩეველი ვყოფილიყავი, დარჩენას ვურჩევდი. თავისუფალ ქვეყანაში ვცხოვრობთ და ყველას შეუძლია ისე მოიქცეს, როგორც მოუნდება.

მოლაპარაკებებში ჩართვას არ ვაპირებთ. ფეხბურთელს ჩვენთან კონტრაქტი აკავშირებს და თუ მას დარჩენა არ უნდა, მსურველმა კლუბმა გამოსასყიდი თანხა უნდა გადაიხადოს. არ გვაინტერესებს, ვინ გადაიხდის ამ თანხას, “ბარსა”, თუ უცხოური გუნდი.

ბართომეუ? მასთან არ მისაუბრია და სალაპარაკო არც არაფერი გვაქვს.” – ციტირებს სერესოს სიტყვებს Sport.

ანტუან გრიზმანის გამოსასყიდი თანხა 120 მილიონი ევროა. “ბარსელონა” მზადაა ეს თანხა გადაიხადოს, მაგრამ კატალონიელებს ურჩევნიათ ეს “ატლეტიკოსთან” შეთანხმების მიღწევის გზით გააკეთონ. თუ ასე მოხდა, კატალონიელები დამატებით გადასახადებს თავიდან აირიდებენ.