ბენზემას მიღწევა, რომელიც მესის არ აქვს

31 წლის ფრანგმა ფეხბურთელმა ესპანეთის ჩემპიონატის გასულ ტურში მნიშვნელოვან მიზანს მიაღწია.

როგორც იცით, მადრიდის “რეალმა” ბოლო მატჩი “უესკას” წინააღმდეგ ჩაატარა და ანგარიშით 3-2 მოიგო. თითქოს მატჩი ფრედ უნდა დასრულებულიყო, თუმცა 89-ე წუთზე კარიმ ბენზემამ გამარჯვების მომტანი ბურთი გაიტანა.

ეს კი იმას ნიშნავს, რომ ამ დროისთვის ბენზემას ლა ლიგის აბსოლუტურად ყველა გუნდის კარში აქვს გატანილი, ვის წინააღმდეგაც უთამაშია. “უესკა” რიგით 34-ე ესპანური გუნდი აღმოჩნდა, რომლის კარიც ფრანგმა აიღო.

საინტერესოა, რომ კარიმმა მექსიკელი უგო სანჩესის რეკორდი დაამხო, რომელსაც 33 გუნდთან აქვს გატანილი. ამ მიღწევით ვერც ლიონელ მესი და ვერც კრიშტიანუ რონალდუ დაიკვეხნიან.

რაც შეეხება მესის, მართალია, მან პრიმერა დივიზიონში უფრო მეტს გაუტანა, ვიდრე ბენზემამ, თუმცა ყველა გუნდთან გატანილი არ აქვს. ის სულ 40 გუნდს შეხვედრია და აქედან 38 გუნდის კარის აღება შეძლო. “კადისი” და “მურსია” – ეს სწორედ ის ორი გუნდია, რომელთა მეკარეების დამწუხრებაც ჯერჯერობით არგენტინელმა ვერ შეძლო.