რომაელები “ბარსელონას”: კიდევ ერთხელ გვიჩვენეთ, რომ ხართ “მეტი, ვიდრე კლუბი”

რომაული გაზეთი il Romanista, “ბარსელონას” საინტერესო ღია წერილით მიმართავს – იტალიელები კატალონიელებს კლუბის ღირებულებებს შეახსენებენ და სთხოვენ, “რომასთან” ჩემპიონთა ლიგაზე გასამართი მატჩისთვის, “კამპ ნოუს” ბილეთების ფასები შეამცირონ.

“რომას” გულშემატკივრებს, ბარსელონაში გასამართ მატჩზე დასწრება 90 ევრო დაუჯდებათ. ეს საკმაოდ ძვირია იმასთან შედარებით, რაც მათ “ატლეტიკოსთან” (60 ევრო) და “ჩელსისთან” (40 ევრო) დაპირისპირებების დროს გადაიხადეს.

რომაული გაზეთი “ბარსელონას” პრეზიდენტს, ჟოზეპ მარია ბართმეუს იტალიურ და კატალონიურ ენებზე შემდეგი ტექსტით მიმართავს:

“თქვენი კლუბი, საფეხბურთო სამყაროში, ყოველთვის გამორჩეული იყო იმით, რასაც მოედანზე და მოედანს მიღმა აკეთებდა. “ბარსელონა” სოციალური შრომის სიმბოლოდ იქცა – “მეტი, ვიდრე კლუბი”. თქვენი კლუბის წმინდა მაისური, პირველად, Unicef-ის ლოგოთი “წაიბილწა”.

გთხოვთ დაფიქრდეთ, რას ნიშნავს რომაელი მამისთვის, ამ თამაშზე წაიყვანოს თავისი შვილები. წილისყრიდან რამდენიმე საათში, რომა-ბარსელონას რეისები, რომლებიც, როგორც წესი, ეკონომიურობით გამოირჩევა, ძალიან გაძვირდა. იგივე მოხდა სასტუმროების შემთხვევაშიც.

იმისათვის, რომ ოჯახი “კამპ ნოუზე” გასამართ დაპირისპირებას დაესწროს, ზედმეტი 180, 270 ან 360 ევრო უნდა გადაიხადოს. თუ ასე გაგრძელდება, საყვარელი გუნდის მხარდაჭერა, გულშემატკივრების უდიდესი ნაწილისთვის, მიუწვდომელ ფუფუნებად იქცევა.

კიდევ ერთხელ გვიჩვენეთ, რომ ხართ “მეტი, ვიდრე კლუბი”. გვაქვს რწმენა და იმედი, რომ ამ პეტიციას განიხილავთ. ეს იქნება საუკეთესო ქმედება, რასაც თქვენ გააკეთებთ, ყოველ შემთხვევაში, თამაშის დაწყებამდე მაინც.”