“ბეტისი”-“ბარსელონა” – ლუის სუარესი სასტარტოში ბრუნდება

“ბარსელონას” ურუგვაელი ვარსკვლავი ლუის სუარესი, “ესპანლიონთან” მატჩის სათადარიგოზე დაწყების შემდეგ, “ბეტისთან” შეხვედრაში სასტარტო შემადგენლობაში დაბრუნდება.

სუარესი შესანიშნავ ფორმაშია, “ბარსელონას” კი, “ბეტისთან” მატჩამდე, ესპანეთის ჩემპიონატში უახლოეს მდევართან 8-ქულიანი უპირატესობა აქვს.

როგორც უკვე აღვნიშნეთ, ურუგვაელ ფეხბურთელს “ესპანიოლთან” მატჩი ძირითადში არ დაუწყია და ალბათ, შემთხვევითი არაა, რომ კატალონიურმა გრანდმა გოლის გატანა ვერ შეძლო. “ბარსამ” ნოემბერში გამართული “იუვენტუსთან” უგოლო მატჩის შემდეგ პირველად ვერ გაიტანა.

სუარესმა სეზონი ცუდად დაიწყო, თუმცა ახლა მასში ეჭვი აღარავის ეპარება. ლუისს უკვე ხშირად გააქვს გოლები და ის, ლიონელ მესის შემდეგ, პრიმერას 2017/18 წლების გათამაშების საუკეთესო ბომბარდირია.

სუარესისთვის “ბეტისი” შესანიშნავი მეტოქეა. მის ანგარიშზე სევილიურ კლუბთან გამართულ 4 მატჩში 7 გოლია, ეს კი გვაფიქრებინებს, რომ ურუგვაელი ვარსკვლავი დღეს კიდევ ერთხელ გაიბრწყინებს.