სატრანსფერო ფანჯრის გადამწყვეტი ეტაპი: ვინ შეუერთდება „ბარსელონას“? [გამოკითხვა]

2017 წლის ზაფხულში კატალონიის “ბარსელონას” ნელსონ სემედუ, ჟერარ დეულოფეუ, პაულინიო და უსმან დემბელე შეუერთდნენ, მაგრამ ამით სატრანსფერო კამპანია ჯერ არ დასრულებულა.

ესპანეთის ვიცე-ჩემპიონებმა ნეიმარი 20 წლის პერსპექტიული ფრანგი ფორვარდით ჩაანაცვლეს, რომელმაც გასულ სეზონში ყველა ტურნირზე 20 საგოლე გადაცემა გააკეთა. 105 მილიონი ევროს სანაცვლოდ “ბარსელონას” უსმან დემბელე შეუერთდა, რომელიც სისწრაფით, გადაცემების სიზუსტითა და საოცრად დახვეწილი დრიბლინგით გამოირჩევა. ამ მოთამაშეს ყველაფერი აქვს იმისთვის, რომ ბრაზილიელის წასვლა ქომაგებს დაავიწყოს.

ახალწვეულის პრეს-კონფერენციაზე კლუბის სპორტული დირექტორისა და ჟურნალისტების საუბარს დიდი დრო დაეთმო. რობერტ ფერნანდესმა განაცხადა, რომ მისი მიზანი სატრანსფერო ფანჯრის დახურვამდე შემადგენლობის კიდევ უფრო გაძლიერებაა. ამის სურვილი “ბლაუგრანას” თავკაცმა, ერნესტო ვალვერდემაც გამოთქვა.

სატრანსფერო ფანჯარა გადამწყვეტ ფაზაში შედის, მედია კი “ბარსელონას” სხვადასხვა სახელებს უკავშირებს. ყველაზე აქტიურად პრესა შემდეგ მოთამაშეებს მოიხსენიებს: ფილიპე კოუტინიო, პაულო დიბალა, ანტუან გრიზმანი, ლემარი, ანხელ დი მარია, რიად მაჰრეზი, ლორენცო ინსინიე, მესუთ იოზილი და იულიან დრაქსლერი. 

წარმოგიდგენთ “ლურჯ-ბროწეულისფერთა” რადარზე მყოფი თითოეული ფეხბურთელის თამაშის ამსახველ ვიდეოს, 2016/17 წლების სეზონის პირად სტატისტიკას და “ბარსელონაში” ტრანსფერის თაობაზე დაწერილ უკანასკნელ ინფორმაციას.

ფილიპე კოუტინიო – 25 წლის

2016/17 წლების სეზონში ფილიპე კოუტინიომ “ლივერპულის” მაისურით 36 მატჩი ჩაატარა, 14 გოლი გაიტანა და 9 შედეგიანი გადაცემა გააკეთა. ბრაზილიელმა ფეხბურთელმა მოედანზე 2531 წუთი დაჰყო.

ფილიპეს “ბარსელონაში” თამაში სურს, რაც აშკარაა. ბრაზილიელმა “ლივერპულის” ხელმძღვანელობას, “ბარსელონასთან” გამართული უშედეგო მოლაპარაკების შემდეგ, ტრანსფერზე დაყენება მოსთხოვა. მიმდინარე სეზონში კოუტინიოს “წითლების” მაისურით ოფიციალური შეხვედრა ჯერ არ ჩაუტარებია და მედიას თუ დავუჯერებთ, მერსისაიდელთა ათიანი ამის გაკეთებას არც აპირებს.

Yahoo Sport-ის მიერ გავრცელებული უკანასკნელი ინფორმაციით, “ლივერპული” და “ბარსელონა” 160 მილიონ ევროზე შეთანხმდნენ.

[media=https://www.youtube.com/watch?v=w3H4I1LBzGs]

პაულო დიბალა – 23 წლის

2016/17 წლების სეზონში პაულო დიბალამ “იუვენტუსის” მაისურით 48 მატჩი ჩაატარა, 19 გოლი გაიტანა და 9 შედეგიანი გადაცემა გააკეთა. არგენტინელმა ფეხბურთელმა მოედანზე 3370 წუთი დაჰყო.

“ლივერპულთან” მოლაპარაკების პროცესში არსებული სირთულეების გათვალისწინებით, “ბარსელონა” მზადაა ალტერნატიული ვარიანტები განიხილოს, ერთ-ერთი მათგანი კი სწორედ “ბებერი ქალბატონის” ახალგაზრდა ლიდერი, პაულოა.

Corriere dello Sport-ის ინფორმაციით, “ბარსელონამ” “იუვენტუსს” პაულო დიბალას სანაცვლოდ 160 მილიონი ევრო შესთავაზა, მაგრამ ტურინულმა კლუბმა არგენტინელი ფორვარდის გაყიდვა არ მოისურვა.

ტანკრედი პალმერი გვამცნობს, რომ ზემოთ აღნიშნული თანხიდან 45 მილიონ ევროს “ლურჯ-ბროწეულისფრები” “ბებერ ქალბატონს” ბონუსების სახით სთავაზობდნენ.

[media=https://www.youtube.com/watch?v=stA3PmmBXak]

ანტუან გრიზმანი – 26 წლის

2016/17 წლების სეზონში ანტუან გრიზმანმა “ატლეტიკოს” მაისურით 53 მატჩი ჩაატარა, 26 გოლი გაიტანა და 12 შედეგიანი გადაცემა გააკეთა. ფრანგმა ფეხბურთელმა მოედანზე 4559 წუთი დაჰყო.

აგვისტოს დასაწყისში დაიწერა, რომ “ბარსელონას” მწვრთნელი, ერნესტო ვალვერდე ანტუან გრიზმანით ინტერესდებოდა. ამჟამად ფრანგის გამოსასყიდი თანხა 200 მილიონი ევროა, 1 წლის შემდეგ კი ეს თანხა ორჯერ შემცირდება. MD მაშინ ვარაუდობდა, რომ კატალონიური კლუბი “ატლეტიკოს” ლიდერის შეძენის ვარიანტს მომდევნო ზაფხულში მიუბრუნდებოდა, მაგრამ “ლივერპულთან” მოლაპარაკების პროცესში შექმნილმა სირთულემ ესპანეთის ვიცე-ჩემპიონს მადრიდელთა შვიდიანი გაახსენა.

[media=https://www.youtube.com/watch?v=m_S9dPIMHSQ]

ლემარი – 21 წლის

2016/17 წლების სეზონში ტომას ლემარმა “მონაკოს” მაისურით 55 მატჩი ჩაატარა, 14 გოლი გაიტანა და 17 შედეგიანი გადაცემა გააკეთა. ფრანგმა ფეხბურთელმა მოედანზე 4209 წუთი დაჰყო.

Sport-ის ინფორმაციით, “ბარსელონამ” ბოლო საათებში ლემარის ტრანსფერის დაჩქარება სცადა, რომელიც ფილიპე კოუტინიოს ალტერნატივად განიხილება. 21 წლის ფეხბურთელის ფასი დაახლოებით 80 მილიონი ევროა. ესპანური პრესის ცნობით, “ლივერპულის” ლიდერის ტრანსფერის მრავალჯერ დაბლოკვის შემდეგ “ბლაუგრანა” საქმეში ჩაება.

კატალონიური გრანდი უკვე დაუკავშირდა “მონაკოსაც” და ფეხბურთელსაც შესაძლო ტრანსფერის თაობაზე და ორივე შემთხვევაში პოზიტიური პასუხი მიიღო.

[media=https://www.youtube.com/watch?v=nwm_nJ8TExc]

ანხელ დი მარია – 29 წლის

2016/17 წლების სეზონში ანხელ დი მარიამ “პარი სენ-ჟერმენის” მაისურით 43 მატჩი ჩაატარა, 14 გოლი გაიტანა და 15 შედეგიანი გადაცემა გააკეთა. არგენტინელმა ფეხბურთელმა მოედანზე 3091 წუთი დაჰყო.

Cadena SER-ის ინფორმაციით, ანხელ დი მარიამ უკვე სთხოვა პარიზელთა მთავარ მწვრთნელს – უნაი ემერის “ბარსელონაში” გაშვება. პსჟ-მ უკვე ორი წინადადება დაბლოკა არგენტინელის თაობაზე. ახლა კი მისი “ბარსელონაში” გადასვლა ფელიპე კოუტინიოს ტრანსფერზე იქნება დამოკიდებული, რომელიც დიდ ბურუსშია მოქცეული.
ყველასთვის ცნობილია “პარი სენ-ჟერმენის” ინტერესი ანდრე გომეშის მიმართ, Mundo Deportivo კი გვამცნობს, რომ “ბარსელონა” პორტუგალიელისა და არგენტინელის გაცვლის წინააღმდეგი არ არის.

რიად მაჰრეზი – 26 წლის

2016/17 წლების სეზონში რიად მაჰრეზმა “ლესტერის” მაისურით 48 მატჩი ჩაატარა, 10 გოლი გაიტანა და 7 შედეგიანი გადაცემა გააკეთა. ალჟირელმა ფეხბურთელმა მოედანზე 3766 წუთი დაჰყო.

ალჟირის ფეხბურთის ფედერაციის ოფიციალურ საიტზე დადასტურდა ინფორმაცია იმის შესახებ, რომ მაჰრეზმა ევროპაში გამგზავრებისა და ახალ გუნდში ტრანსფერის საკითხის გადაწყვეტის უფლება მიიღო.

AS-ის ინფორმაციით, რიადი “ბარსელონასთან” ახლოსაა. ტრანსფერის სანაცვლოდ კატალონიელებს სავარაუდოდ, 50 მილიონი ევროს გადახდა მოუწევთ. ფრანგული მედია კატალონიური კლუბის მთავარ კონკურენტად ლონდონის “ჩელსის” მოიხსენიებს.

[media=https://www.youtube.com/watch?v=iAoNs9LanLw]

ლორენცო ინსინიე – 26 წლის

2016/17 წლების სეზონში ინსინიემ “ნაპოლის” მაისურით 49 მატჩი ჩაატარა, 20 გოლი გაიტანა და 12 შედეგიანი გადაცემა გააკეთა. იტალიელმა ფეხბურთელმა მოედანზე 3767 წუთი დაჰყო.

Calcionews24-მა დაწერა, რომ “ბარსელონამ” ლორენცოს სანაცვლოდ “ნაპოლის” 100 მილიონი ევრო შესთავაზა, მაგრამ აქედან რამდენიმე დღის შემდეგ იტალიური კლუბის პრეზიდენტმა, აურელიო დე ლაურენტისმა საინტერესო კომენტარი გააკეთა შესაძლო ტრანსფერთან დაკავშირებით.

განცხადების კითხვისას მხედველობაში იქონიეთ ის ფაქტი, რომ მინო რაიოლამ ინსინიეს “ბარსელონაში” გადასვლისკენ მოუწოდა.

“რაიოლას შეუძლია გააკეთოს ყველაფერი რასაც მოისურვებს, მაგრამ თუ მას ლორენცო ინსინიეს “ბარსელონაში” ტრანსფერი სურს, ჯერ მე უნდა მომკლას. წინააღმდეგ შემთხვევაში სასურველ მიზანს ვერ მიაღწევს.”

ეს კომენტარი ინსინიეს “ბარსელონაში” ტრანსფერის ალბათობას საგრძნობლად ამცირებს, მაგრამ იტალიელი კატალონიელთა რადარიდან ჯერ არ გამქრალა.

[media=https://www.youtube.com/watch?v=unsE1NySGXA]

მესუთ იოზილი – 28 წლის

2016/17 წლების სეზონში იოზილმა “არსენალის” მაისურით 44 მატჩი ჩაატარა, 12 გოლი გაიტანა და 14 შედეგიანი გადაცემა გააკეთა. გერმანელმა ფეხბურთელმა მოედანზე 3746 წუთი დაჰყო.

Football Espana-ს ინფორმაციით, “ბარსელონამ” არდა თურანის მესუთ იოზილში გაცვლა სცადა.

გერმანელის კონტრაქტი “არსენალთან” 1 წლის შემდეგ იწურება და “ბარსელონამ” ჩათვალა, რომ “მეთოფეები” მსგავს გარიგებას დათანხმდებოდნენ. თუმცა, ინგლისურმა კლუბმა ტრანსფერზე უარი თქვა და ახლა მესუთის უფასოდ დაკარგვის რისკის წინაშე დგას.

[media=https://www.youtube.com/watch?v=3jnrSqFnIAo]

იულიან დრაქსლერი – 23 წლის

2016/17 წლების სეზონში დრაქსლერმა პსჟ-ს მაისურით 25 მატჩი ჩაატარა, 10 გოლი გაიტანა და 3 შედეგიანი გადაცემა გააკეთა. გერმანელმა ფეხბურთელმა მოედანზე 1576 წუთი დაჰყო.

აგვისტოს საწყის რიცხვებში Bild-მა დაწერა, რომ იულიანის აგენტი, როჯერ ვიტმანი ბარსელონაში გერმანელი ნახევარმცველის ტრანსფერის საკითხის გადასაწყვეტად იმყოფებოდა.

ამის შემდეგ დრაქსლერის თაობაზე არავითარი განახლება არ ყოფილა. “ბარსელონას” სხვა კლუბებიც უწევენ კონკურენციას.

[media=https://www.youtube.com/watch?v=pWDsliqwkGE]

აღსანიშნავია, რომ მიმდინარე ზაფხულში სხვადასხვა მიზეზების გამო “ბარსელონაში” მარკო ვერატისა და ჟან-მიკაელ სერის ტრანსფერები ჩაიშალა. მთელი საფეხბურთო სამყარო კატალონიური კლუბის ირგვლივ განვითარებულ მოვლენებს აკვირდება და მხოლოდ დრო გვიჩვენებს, თუ როგორ გააძლიერებენ ესპანეთის ვიცე-ჩემპიონები შემადგენლობას.

სპეციალურად, Barcamania.ge-სთვის…