პსჟ-ს ნეიმარის გაფორმება მიმდინარე ზაფხულშივე სურს

მოგეხსენებათ, ბოლო დროს გავრცელებული ინფორმაციის თანახმად, “პარი სენ-ჟერმენი” დაინტერესებულია ნეიმარის შეძენით, თავად ფეხბურთელის გარემოცვა კი მას ურჩევს, რომ “ბარსელონა” დატოვოს.

ინფორმაცია იმის შესახებ, რომ ბრაზილიელი შემტევი “ბარსელონაში” თავს კომფორტულად არ გრძნობს, Sport-მა გაავრცელა. ამის შემდეგ კი უკვე პარიზშიც და ბრაზილიაშიც იწერება, რომ პსჟ-ს “ბლაუგრანას” დასუსტება მიმდინარე ზაფხულშივე სურს.

პარიზული კლუბის ხელმძღვანელობა ნეიმარს ჰპირდება პროექტს, რომლის ლიდერიც თავად ბრაზილიელი იქნება და მას აღარ მოუწევს მესის ჩრდილში ყოფნა. პარიზელები არწმუნებენ, რომ გუნდი მას ინდივიდუალური გაბრწყინებისა და შედეგად ინდივიდუალური ჯილდოების მოგების საშუალებას მისცემს.

აღსანიშნავია, რომ პსჟ-სა და ნეიმარის გზები პირველად არ გადაკვეთილა. გასულ ივნისში, ფეხბურთელი, მისი მამა, აგენტი ვაგნერ რიბეირუ და ნასერ ალ-ხელაიფი ერთმანეთს შეხვდნენ იბიცაზე და მათი საუბარი კერძო იახტაზე შედგა.

ერთი წლის შემდეგ კი, სცენარი ცოტათი შეიცვალა. საქმეს გამოეთიშა ვაგნერ რიბეირუ, რომელსაც ბრაზილიის სასამართლომ გადასახადების დამალვისთვის 5 წელი მიუსაჯა.

ნეიმარმა, რა თქმა უნდა, სხვა შემოთავაზებებიც მოისმინა, თუმცა თავად მოუწოდა მამამისს, დათანხმებოდა “ბარსელონას” შეთავაზებას კონტრაქტის გახანგრძლივების თაობაზე.

მიუხედავად ჟოზე მოურინიოს ზარისა და პსჟ-ს შეთავაზებებისა, ესპანური პრესის მიხედვით, ნეიმარი “ბარსელონას” ერთგული რჩება. მიუხედავად ამისა, ყოველთვის, როცა მას თავის მომავალზე კითხვას უსვამენ, ფეხბურთელი აღნიშნავს, რომ გამოცდიდა სხვა ლიგებში თამაშს და ასევე იმასაც ამატებს, რომ კარიერის ბოლოს გაუჩოს მსგავსად “ფლამენგოში” თამაში სურს.

სწორედ ეს აძლევს კლუბებს იმის იმედს, რომ ნეიმარის გადაბირებას შეძლებენ. ნეიმარის მამაც მათ შეთავაზებებს განიხილავს.

ნეიმარმა “ბარსელონაში” უკვე დაწერა ისტორია, ისევე, როგორც “სანტოსში”. ის უკვე 4 სეზონია, რაც ლურჯ-ბროწეულისფერ ფორმას ატარებს და კონტრაქტის მიხედვით ასე კიდევ 4 სეზონი გაგრძელდება. ორივე კლუბში მან მოიგო კონტინენტის ყველაზე პრესტიჟული ჯილდოები და კატალონიური გუნდის მაისურით მსოფლიოს საკლუბო ჩემპიონატშიც გაიმარჯვა. ასე რომ, მისი “ბარსელონური” კარიერა წარმატებულად მიმდინარეობს.

პსჟ-სთვის ბრაზილიელის გაფორმება მარტივი არ იქნება, რამეთუ მას წინ საკმაოდ დიდხნიანი კონტრაქტი ეღობება. ალბათ ორი გუნდი, რომელიც პარიზელებისთვის კონკურენციის გაწევას შეძლებს ფინანსური თვალსაზრისით, “მანჩესტერ იუნაიტედი” და “მანჩესტერ სიტია”. რაც შეეხება “რეალს”, Sport-ის სტატიაში ვკითხულობთ, რომ ნეიმარი მადრიდულ გუნდს არ შეუერთდება, რაოდენ დიდი თანხაც არ უნდა გადაიხადოს ფლორენტინო პერესმა.

რა თქმა უნდა, ნეიმარმა იცის, თუ რას სთავაზობს მას პსჟ. აღსანიშნავია, რომ ეს გუნდი ევროპაში ერთ-ერთი გამორჩეულია იმათგან, ვინც ბრაზილიელ ფეხბურთელებზე აკეთებს აქცენტს. ავიღოთ თუნდაც რაის მაგალითი, რომელმაც 90-იან წლებში პარიზული გუნდის მაისურით დიდ წარმატებას მიაღწია. ასევე “ბარსელონას” ლეგენდა – რონალდინიო გაუჩო, რომელიც კლუბმა სწორედ ფრანგული კლუბისგან შეიძინა.

“პარი სენ-ჟერმენი” ამ მხრივ ყოველთვის გამორჩეული იყო. ტიაგო სილვა, მარკინიოსი, ლუკას მოურა, დანი ალვესი, ტიაგო მოტა – ეს ის ფეხბურთელები არიან, რომლებმაც შესაძლოა ნეიმარისთვის კომფორტული გარემო შექმნან.

პსჟ ნეიმარს სთავაზობს ხანგრძლივ პროექტს, რომელიც შემტევს გვირგვინის დადგმის საშუალებას მისცემს. პარიზელები გუნდის გაძლიერების ერთ-ერთ ვარიანტად ბრაზილიელს ყოველთვის განიხილავდნენ და ახლა ნასერ ალ-ხელაიფი ხედავს, რომ შარშანდელთან შედარებით, სიტუაცია განსხვავებულია. მიუხედავად ყველაფრისა, ჯერ-ჯერობით ეს ტრანსფერი ძალიან რთული და ჩახლართული ჩანს.