ყველაფერი, რაც „ეიბარზე“ უნდა იცოდეთ

ხვალ, თბილისის დროით, 23:45 საათზე, სტარტს აიღებს მატჩი “ეიბარსა” და “ბარსელონას” შორის. სანამ მატჩის ყურებას დავიწყებდეთ, ალბათ, უინტერესო არ იქნებოდა თუ გავიგებდით ცოტაოდენ და, ამავდროულად, საჭირო ინფორმაციას “ბარსას” მეტოქეზე.

ეიბარი პატარა ქალაქია, რომელიც ბასკეთში მდებარეობს. ის დაახლოებით, მოთავსებულია ბასკეთის ორი დიდი ქალაქის – ბილბაოს და სან-სებასტიანს შორის. მოსახლეობა – 30 000. ეიბარი ყველაზე პატარა ქალაქია ლა ლიგის ისტორიაში.

“სოსიედად დეპორტივა ეიბარ” – ასეთია კლუბის სრული სახელი. ის დაარსდა 1940 წელს. თავდაპირველად, მათი მაისური იყო “ატლეტიკ ბილბაოს” მაისურის ფერებში (წითელი-თეთრი), ხოლო შემდეგ, მათ მიმართეს “ბარსელონას” მაისურის მოდელს და ახლა მათ ლურჯ-ბროწეულისფერი მაისურები აცვიათ.

“ესტადიო მუნისიპალ დე იპურუა” ან უბრალოდ, “იპურუა” “ეიბარის” საშინაო სტადიონია. ეს სტადიონი 7000 მაყურებელს იტევს და 2015 წლიდან დიდი განახლების პროცესშია.

“ეიბარის” მთავარი მწვრთნელი ხოსე ლუის მენდილიბარია. ის, ბოლო 2 ათწლეულში ბევრ კლუბში მუშაობდა, მათ შორის: “ვალიადოლიდი”, “ოსასუნა”, “ლევანტე”.

“ეიბარს” ყველაზე მეტი წელი აქვს გატარებული სეგუნდა დივიზიონში, მაგრამ 2014/15 წლების სეზონიდან, ისინი ლა ლიგაში გვევლინებიან. მიუხედავად იმისა, რომ იმავე სეზონში, მათ მე-18 პოზიცია დაიკავეს, ისინი მაინც არ გავარდნენ, რადგან პრობლემების გამო “ელჩე” დააქვეითა ლა ლიგამ.

“ეიბარის” მარცხენა მცველი დავიდ ხუნკა, თავის დროზე, “ბარსელონაში” თამაშობდა. ის ირიცხებოდა “ბარსელონას” ახალგაზრდულ გუნდში, სადაც მისი თანაგუნდელი რაფინია იყო, მაგრამ ხუნკამ “ჟირონაში” გადასვლა ამჯობინა კატალონიურ კლუბს.