“ბილბაოს” ახალგაზრდა ცენტრალური მცველი აიმერიკ ლაპორტი, რომელიც “ბარსელონას” მთავარი სამიზნეა, “მანჩესტერ სიტიში” გადასვლასთან ახლოსაა. ამ ინფორმაციას კატალონიური Sport ავრცელებს.
“ბარსელონა” ლაპორტის შეძენით ჯერ კიდევ იმ დროიდანაა დაინტერესებული, როდესაც გუნდს პეპ გვარდიოლა წვრთნიდა. როგორც ჩანს, კატალონიელ სპეციალისტს ბასკი მცველის მიმართ ინტერესი არ განელებია. ცნობილია, რომ ის, მომდევნო სეზონში, “სიტის” ჩაიბარებს და მანჩესტერელებმა 21 წლის ფეხბურთელის შეძენაზე ზრუნვა უკვე დაიწყეს.
ესპანური პრესის ცნობით, “ქალაქელებმა” თავად ლაპორტთან შეთანხმებას უკვე მიაღწიეს. ახლა კლუბებს შორის მოლაპარაკებებია დარჩენილი. ფეხბურთელის გამოსასყიდი თანხა 50 მილიონი ევროა.
