“ბარსელონა” Globe Soccer Awards 2026-ზე ერთ-ერთი ყველაზე ფართოდ წარმოდგენილი კლუბია. კატალონიურ გუნდს 11 სხვადასხვა კატეგორიაში 22 ნომინაცია აქვს, რომლებიც კაცთა და ქალთა გუნდების ფეხბურთელებს, მწვრთნელებსა და სპორტულ ხელმძღვანელობას მოიცავს.
კლუბის ოფიციალური ვებგვერდის ინფორმაციით, გამარჯვებულები გულშემატკივრებისა და სპეციალური ჟიურის ხმების საფუძველზე გამოვლინდებიან. გამონაკლისია ისტორიული კლუბის ჯილდო, რომლის მფლობელსაც მხოლოდ გულშემატკივრები აირჩევენ.
ქალთა გუნდის ხუთი ფეხბურთელი საუკეთესო მოთამაშის ჯილდოსთვის იბრძოლებს
წლის საუკეთესო ქალი ფეხბურთელის ნომინაციაში “ბარსელონას” ხუთი წარმომადგენელი ჰყავს: ევა პაიორი, კლაუდია პინა, კატა კოლი, კაროლინ გრემ ჰანსენი და პატრი გიხარო.
ყველა მათგანმა მნიშვნელოვანი როლი შეასრულა გუნდის წარმატებებში. კატალონიელებმა ესპანეთის სუპერ თასი, ესპანეთის თასი, ჩემპიონატი და ჩემპიონთა ლიგა მოიგეს.
კუბარსი, ლამინ იამალი, რაფინია და როდრი საუკეთესო ფეხბურთელის ნომინაციაში
კაცთა შორის წლის საუკეთესო ფეხბურთელის ჯილდოსთვის “ბარსელონას” ოთხი მოთამაშე იბრძოლებს: პაუ კუბარსი, რაფინია, როდრი და ლამინ იამალი.
განსაკუთრებით აღსანიშნავია პაუ კუბარსი, რომელმაც უკვე მოიპოვა Golden Boy-ს ჯილდო. ახალგაზრდა მცველი კიდევ ორ კატეგორიაშია წარდგენილი – წლის საუკეთესო მცველისა და საუკეთესო ახალგაზრდა ფეხბურთელის.
სხვა ინდივიდუალურ ნომინაციებში “ბარსელონას” წარმომადგენლები ასე გადანაწილდნენ:
- საუკეთესო მეკარე: ჟოან გარსია.
- საუკეთესო ნახევარმცველი: პედრი და როდრი.
- საუკეთესო თავდამსხმელი: რაფინია და ლამინ იამალი.
- საუკეთესო მცველი: პაუ კუბარსი.
- საუკეთესო ახალგაზრდა ფეხბურთელი: პაუ კუბარსი.
ჟოან გარსია ნომინანტებს შორის გასულ სეზონში მოპოვებული პირველი სამორას ჯილდოს შემდეგ მოხვდა.
ფლიკი, პერე რომეუ და დეკუ
“ბარსელონას” წარმომადგენლები სამწვრთნელო და სპორტული მენეჯმენტის კატეგორიებშიც არიან წარდგენილი.
წლის საუკეთესო მწვრთნელის ჯილდოსთვის ჰანსი ფლიკი და ქალთა გუნდის მთავარი მწვრთნელი პერე რომეუ იბრძოლებენ.
ფლიკის ხელმძღვანელობით “ბარსელონამ” ესპანეთის ჩემპიონატი ზედიზედ ორჯერ მოიგო. ანალოგიურ წარმატებას მიაღწია რომეუმაც, რომლის ხელმძღვანელობით ქალთა გუნდმა ორივე სეზონში მოიპოვა ჩემპიონობა.
საუკეთესო სპორტული დირექტორის ნომინაციაში კი კლუბის წარმომადგენელი დეკუა.
ბარსელონა სამ საკლუბო ნომინაციაში
კატალონიური კლუბი კიდევ სამ კატეგორიაში იბრძოლებს:
- წლის საუკეთესო კაცთა გუნდი.
- წლის საუკეთესო ქალთა გუნდი.
- გულშემატკივრების რჩეული ისტორიული კლუბი.
აღსანიშნავია, რომ “ბარსელონას” ქალთა გუნდმა საუკეთესო ქალთა კლუბის ჯილდო უკვე მოიპოვა “ოქროს ბურთის” ბოლო დაჯილდოებაზე.
საერთო ჯამში, “ბარსელონას” Globe Soccer Awards 2026-ზე 22 ნომინაცია დაუგროვდა. დაჯილდოების ცერემონია 28 დეკემბერს არაბთა გაერთიანებულ საამიროებში გაიმართება.
გულშემატკივრებს ხმის მიცემა კონკურსის ოფიციალურ ვებგვერდზე, vote.globesoccer.com-ზე შეუძლიათ.




forum კომენტარები (0)