“ბარსელონას” აკადემიის აღზრდილი ალექს ვალიე, რომელიც ამჟამად იტალიური “კომოს” ღირსებას იცავს, კატალონიურ კლუბში გატარებულ პერიოდსა და ჰანსი ფლიკთან ურთიერთობას იხსენებს.
როგორც Mundo Deportivo წერს, 22 წლის მარცხენა მცველმა Marca-სთან ინტერვიუში განმარტა, რატომ გადაწყვიტა “ბარსელონას” დატოვება, მიუხედავად იმისა, რომ გერმანელი მწვრთნელის მუშაობის სტილი ძალიან მოსწონდა.
ვალიე 2024 წლის ზაფხულში, “ანდორასა” და “ლევანტეში” იჯარით თამაშის შემდეგ, “ბარსელონაში” დაბრუნდა. ახალგაზრდა ფეხბურთელს პირველი გუნდის შემადგენლობაში ადგილის დამკვიდრების იმედი ჰქონდა და წინასასეზონო მომზადება ჰანსი ფლიკის ხელმძღვანელობით გაიარა.
გერმანელი სპეციალისტი მას მარჯვენა მცველის პოზიციაზე ათამაშებდა, თუმცა ვალიე საკუთარ თავს მარცხენა ფლანგზე ხედავდა, სადაც ალეხანდრო ბალდესა და ჟერარ მარტინის სახით სერიოზული კონკურენცია ელოდა.
“ზუსტად არ ვიცოდი, პირველ გუნდში დავრჩებოდი თუ “ბარსა ატლეტიკში” მომიწევდა თამაში.”
ფეხბურთელის თქმით, მისი წასვლა ფლიკთან უთანხმოებას არ გამოუწვევია. პირიქით, გერმანელ მწვრთნელთან მუშაობით კმაყოფილი იყო.
“ფლიკთან თავს ძალიან კარგად ვგრძნობდი. ის, როგორც მწვრთნელი, ძალიან მომწონს და მისი საფეხბურთო იდეებიც მომწონდა.”
მიუხედავად ამისა, ვალიეს რეგულარულად თამაში სურდა და მიიჩნევდა, რომ მისთვის სასურველ პოზიციაზე “ბარსელონაში” საკმარისი ადგილი არ იყო.
ფეხბურთელმა ფლიკთან მეგობრული და გულწრფელი საუბრის შემდეგ “სელტიკის” შეთავაზების მიღება გადაწყვიტა. შოტლანდიურ კლუბში გადასვლა მას ჩემპიონთა ლიგაზე თამაშის შესაძლებლობასაც აძლევდა.
გლაზგოში ვალიემ დაახლოებით ნახევარი წელი გაატარა, 2025 წლის იანვარში კი იჯარით “კომოს” შეუერთდა. იტალიურ კლუბში მისი გამოსვლა იმდენად წარმატებული აღმოჩნდა, რომ იმავე წელს “კომომ” 6 მილიონი ევრო გადაიხადა და ფეხბურთელი სრულფასოვნად დაიმატა.
ვალიე ბარსელონადან წასვლას არ ნანობს
ამჟამად 22 წლის მცველი “კომოს” ძირითადი შემადგენლობის მნიშვნელოვანი წევრი და ესპანეთის 21-წლამდელთა ნაკრების რეგულარული მონაწილეა.
ვალიეს თქმით, მიუხედავად იმისა, რომ “ბარსელონაში” დარჩენის შესაძლებლობა ჰქონდა, კარიერის განმავლობაში მიღებულ გამოცდილებას არაფერში გაცვლიდა.
“არაფერს შევცვლიდი. “ბარსელონაში” დარჩენის შესაძლებლობა მქონდა, მაგრამ დღემდე არაფერს ვნანობ.”
ფეხბურთელი განსაკუთრებით აფასებს სხვადასხვა ქვეყანაში ცხოვრებისა და განსხვავებულ საფეხბურთო გარემოში თამაშის გამოცდილებას.
რას ფიქრობს სესკ ფაბრეგასზე?
ვალიემ თავისი ამჟამინდელი მწვრთნელი, “ბარსელონას” ყოფილი ნახევარმცველი სესკ ფაბრეგასიც შეაქო.
მისი თქმით, ფაბრეგასთან ფეხბურთზე საუბრისას მაშინვე იგრძნობა მწვრთნელის ამბიცია, გამარჯვებისკენ სწრაფვა და თავდაჯერებულობა. ვალიე განსაკუთრებით აფასებს იმას, რომ ფაბრეგასს არცერთი მეტოქის არ ეშინია.
ბარსელონაში დაბრუნება ჩემპიონთა ლიგაზე
ალექს ვალიეს ყოფილი კლუბის წინააღმდეგ თამაშის შესაძლებლობა მალე ექნება.
2027 წლის 27 იანვარს “კომო” ჩემპიონთა ლიგის საერთო ეტაპის მერვე, დასკვნით ტურში “ბარსელონას” დაუპირისპირდება.
ამგვარად, ლა მასიას აღზრდილი ფეხბურთელი კატალონიაში ამჯერად მეტოქის სტატუსით დაბრუნდება.


forum კომენტარები (0)