“ბარსელონას” ქალთა გუნდმა ჩემპიონთა ლიგაზე მორიგი შთამბეჭდავი გამარჯვება მოიპოვა. კატალონიელებმა დანიურ “კიოგეს” სტუმრად 8 უპასუხო გოლი გაუტანეს და ტურნირის საერთო ეტაპზე ლიდერობა განიმტკიცეს.
პერე რომეუს გუნდმა გამარჯვებას საფუძველი პირველივე ტაიმში ჩაუყარა. კაროლინ გრემ ჰანსენისა და ევა პაიორის გოლების შემდეგ სტუმრები შესვენებაზე ორბურთიანი უპირატესობით გავიდნენ. მეორე ნახევარში კი “ბარსელონამ” კიდევ ექვსჯერ გაიტანა.
ამ გამარჯვებით კატალონიელებმა ჩემპიონთა ლიგაზე ქულების მაქსიმუმი, 9 ქულა დააგროვეს. მატჩი განსაკუთრებული იყო პერე რომეუსთვისაც, რომელმაც “ბარსელონას” მთავარი მწვრთნელის რანგში მე-100 გამარჯვება მოიპოვა.
ბარსელონას სრული უპირატესობა პირველ ტაიმში
შეხვედრის დასაწყისიდანვე “ბარსელონა” ბურთს აკონტროლებდა, თამაშის ტემპს კარნახობდა და სახიფათო მომენტებს ქმნიდა. მასპინძლები კონტრშეტევებზე ცდილობდნენ პასუხის გაცემას, თუმცა კატალონიელთა დაცვა მათ ამის საშუალებას არ აძლევდა.
ანგარიში მე-12 წუთზე გაიხსნა. კაროლინ გრემ ჰანსენმა თერთმეტმეტრიანი ზუსტად შეასრულა და სტუმრები დააწინაურა. გატანილი გოლის შემდეგ “ბარსელონას” უპირატესობა კიდევ უფრო გაიზარდა. თავად გრემ ჰანსენს დუბლის შესრულების შანსიც ჰქონდა, თუმცა მისი დარტყმის შემდეგ ბურთი ძელს მოხვდა.
33-ე წუთზე კატალონიელებმა მეორედ გაიტანეს. კლაუდია პინას გადაცემით ევა პაიორმა ისარგებლა და ანგარიშში სხვაობა ორამდე გაზარდა.
ტაიმის დარჩენილ მონაკვეთში “ბარსელონა” თამაშს დამაჯერებლად აკონტროლებდა. დანიურმა გუნდმა რეალური საგოლე მომენტის შექმნა ვერ მოახერხა და შესვენებაზე სტუმრები 2-0 დაწინაურდნენ.
ექვსი გოლი მეორე ტაიმში
შესვენების შემდეგ “ბარსელონამ” შეტევები კიდევ უფრო გააძლიერა და მეტოქეს პრაქტიკულად არანაირი შანსი არ დაუტოვა.
54-ე წუთზე ესმე ბრუგტსმა თავური დარტყმით მესამე გოლი გაიტანა, 59-ე წუთზე კი პატრი გიხარომ ქუსლით ეფექტური დარტყმით ანგარიში 4-0 გახადა.
სამი წუთის შემდეგ კლარა სერაჟორდიმ საჯარიმოს მისადგომებიდან შესანიშნავი დარტყმით მეხუთე გოლი გაიტანა.
67-ე წუთზე თავი კიკა ნაზარეთმაც გამოიჩინა, რომელმაც ევა პაიორის ზუსტი ჩაწოდებით ისარგებლა და “ბარსელონას” უპირატესობა ექვს ბურთამდე გაზარდა.
მიუხედავად იმისა, რომ მატჩის ბედი უკვე გადაწყვეტილი იყო, კატალონიელები შეტევებს აგრძელებდნენ.
70-ე წუთზე კლაუდია პინამ კიკა ნაზარეთის გადაცემით ისარგებლა და მეშვიდე გოლი გაიტანა. 85-ე წუთზე იგივე ფეხბურთელებმა კიდევ ერთი შედეგიანი კომბინაცია გაითამაშეს: ნაზარეთმა საგოლე გადაცემა შეასრულა, პინამ კი დუბლი გაიფორმა და საბოლოო ანგარიში, 8-0 დააფიქსირა.
ამრიგად, “ბარსელონამ” ჩემპიონთა ლიგის მიმდინარე სეზონში ზედიზედ მესამე გამარჯვება მოიპოვა და საერთო ეტაპის სატურნირო ცხრილის ერთპიროვნულ ლიდერად დარჩა.
კლუბების წარმომადგენლების შეხვედრა მატჩამდე
შეხვედრის დაწყებამდე “ბარსელონას” ვიცე-პრეზიდენტი და ქალთა ფეხბურთზე პასუხისმგებელი ხელმძღვანელი ჩავი პუჩი “კიოგეს” სტადიონის საპატიო ლოჟაში დანიური კლუბის პრეზიდენტს, ალექს ლევინსა და სხვა ხელმძღვანელ პირებს შეხვდა.
მანამდე ასევე გაიმართა შეხვედრა კოპენჰაგენში მოქმედი “ბარსელონას” გულშემატკივართა კლუბის წარმომადგენლებთან.
forum კომენტარები (0)