ატლეტიკოს საბოლოო პოზიცია: ალვარესი არ იყიდება!

არგენტინელი ფეხბურთელი “მეტროპოლიტანოს” არ დატოვებს. მადრიდულ კლუბში გაოცებულები არიან გავრცელებული ინფორმაციით, თითქოს ისინი მზად იყვნენ მოთამაშე “არსენალისთვის” მიეყიდათ. “ატლეტიკოს” აღმასრულებელ დირექტორს, მიგელ ანხელ ხილ მარინს EFE-სთან საუბრისას მოუწია კიდევ ერთხელ გაემეორებინა ის, რაც ბოლო თვეებში უკვე ორჯერ თქვა.

“როგორც ყველა დიდი კლუბი, ‘ატლეტიკოც’ დიდებული ფეხბურთელებით შენდება და ცხადია, რომ ხულიანი ერთ-ერთი მათგანია, თანაც დიდი პროფესიონალი. ჩვენი ღირებულებებით, ადგილობრივი კადრებითა და საუკეთესო უცხოელი მოთამაშეებით უნდა ვიბრძოლოთ,” – აღნიშნა მან.

ჭორები “არსენალთან” მოლაპარაკებებზე წარმოიშვა იმის გამო, რომ “ატლეტიკოს” პროფესიონალური ფეხბურთის დირექტორი, მატეუ ალემანი ლონდონში ნიკოლას ჯექსონის ტრანსფერზე სამუშაოდ იმყოფებოდა (რაც ვერ მოახერხა). კლუბი ლონდონელებთან რაიმე სახის შეხვედრას კატეგორიულად უარყოფს.

ბარსელონასთვის უარის თქმის მიზეზები

ხილ მარინმა კიდევ ერთხელ გაიმეორა, რომ ფეხბურთელი არსად წავა, მით უმეტეს “ბარსელონაში”. მისი თქმით, ეს არცერთ შესაძლო სცენარში არ მოხდება და სიტუაცია ჩიხშია შესული.

“ჩემი პოზიცია ნათელია, კლუბის ნებაც ნათელია. ეს ვაცნობეთ ფეხბურთელს, მის აგენტს და ‘ბარსელონას’ პრეზიდენტს. ეჭვი არ მეპარება, რომ ხულიანისთვის იდეალური ადგილი ‘ატლეტიკოა’, ის კი ჩვენთვის სრულყოფილი თავდამსხმელია. გვსურს, რომ მასზე გათვლები კვლავ გავაკეთოთ.”

მან ჟოან ლაპორტას განცხადებასაც უპასუხა (რომელმაც თქვა, რომ მათი შეთავაზების ვადა უსასრულო არ იყო):

“მოვისმინე პრეზიდენტ ლაპორტას სიტყვები. ჩვენი პასუხი კი სწორედ უსასრულოა – არ გვინდა მისი გაყიდვა. არ ვიღებთ 100-მილიონიან შეთავაზებას და არ მივიღებთ არც 150 და არც 200 მილიონს.”