ჩავი სიმონსმა ბარსელონადან წასვლის რეალურ მიზეზზე ისაუბრა

ჩავი სიმონსმა “ბარსელონა” 2019 წელს ისე დატოვა, რომ პროფესიონალური კონტრაქტი არ გაუფორმებია, მიუხედავად იმისა, რომ იმ დროს მსოფლიო ფეხბურთის ერთ-ერთ მთავარ ტალანტად ითვლებოდა. ნახევარმცველი “პარი სენ-ჟერმენში” გადავიდა და მაშინ ყველა ამბობდა, რომ მან ეს ფულის გამო გააკეთა.

როგორც თავად ფეხბურთელმა The Sports Agents-თან ინტერვიუში განმარტა, ამ მოსაზრებას რეალობასთან საერთო არაფერი ჰქონდა:

“მათი მხრიდან ნათელი იყო, რომ ჩემი არ სჯეროდათ. იმ დროს გადავწყვიტე არაფერი მეთქვა, რადგან მხოლოდ მოედანზე ვიყავი კონცენტრირებული. მათ მითხრეს: ‘გვყავს სხვა მოთამაშეები, რომელთა გვჯერა და გვინდა კონტრაქტი შემოგთავაზოთ, მაგრამ არ ხარ იმ ფეხბურთელებს შორის, რომლებიც რეალურად არიან პროექტში’. ჩემთვის გადაწყვეტილება ნათელი იყო. ხალხმა არ იცის, თუ რა მოხდა რეალურად, მათ აქვთ ის მოსაზრება, რაც მოისმინეს, მაგრამ ნამდვილი ისტორია ესაა.”

ნიდერლანდელმა ფეხბურთელმა კატალონიურ კლუბში გატარებული წლებიც გაიხსენა და დასძინა:

“იქ მთელი ცხოვრება გავატარე. სხვადასხვა სიტუაცია გამოვიარე, ყველაფერი იქ განვიცადე, მთელი ჩემი ბავშვობა იქ იყო, ამიტომ კლუბი მიყვარს. ყველაფერმა, რაც მაშინ გავრცელდა, გული მატკინა მეც და ჩემს ოჯახსაც. საქმე მარტივად იყო: მათ იმ მომენტში უბრალოდ სხვა ბიჭები ამჯობინეს და ჩემთვის ეს ნორმალური იყო. 16 წლის ასაკში მქონდა ‘პარი სენ-ჟერმენის’ ძალიან კარგი პროექტი, ვვარჯიშობდი მსოფლიოს საუკეთესო მოთამაშეებთან, ამიტომ გადაწყვეტილების მიღება მარტივი იყო.”

სიმონსმა პარიზში მიღებულ გამოცდილებაზეც ისაუბრა, სადაც ვარსკვლავებთან ერთად უწევდა თამაში:

“როდესაც მეგობრები მეკითხებიან, ვეუბნები, რომ ეს საუკეთესო გადაწყვეტილებაა, რაც კი ოდესმე მიმიღია. ხალხი შეიძლება ამბობს, რომ არ ვთამაშობდი, მაგრამ, რა თქმა უნდა, ჩემს გვერდით იყვნენ ნეიმარი, მესი და მბაპე. ასე რომ, ნამდვილად რთულია, რადგან მათ ყოველ მატჩში თამაში სურთ, მაგრამ ეს იყო საუკეთესო გამოცდილება, რაც შეიძლებოდა მქონოდა, რადგან მათგან ბევრი რამ ვისწავლე.”