ბარსელონამ პირველ წინასასეზონო მატჩში ევროპა 4-1 დაამარცხა [ვიდეო]

“ბარსელონამ” 2026/27 წლების სეზონისთვის მზადების ფარგლებში პირველი ამხანაგური შეხვედრა ჩაატარა. ჰანსი ფლიკის გუნდმა ჟოან გამპერის სახელობის სპორტულ ბაზაზე, ტიტო ვილანოვას მოედანზე, დახურულ კარს მიღმა “ევროპა” 4-1 დაამარცხა.

გერმანელმა სპეციალისტმა ძირითადად ახალგაზრდული გუნდის ფეხბურთელებს მისცა შანსი. მატჩი კატალონიელთა უპირატესობით წარიმართა და პირველ ტაიმში იბრაჰიმ დიარას (მე-13 წუთი) და ექტორ ფორტის (29-ე წუთი) გოლებით “ბარსელონა” 2-0 დაწინაურდა. მე-40 წუთზე ფლავიომ სხვაობა შეამცირა, თუმცა მეორე ტაიმში ებრიმა ტუნკარამ (48-ე წუთი) და ალექს გონსალესმა (58-ე წუთი) საბოლოო ანგარიში დააფიქსირეს. შეხვედრაში განსაკუთრებით გამოირჩეოდნენ ახალგაზრდა ნახევარმცველები – გილე ფერნანდესი და ბრიან ფარინიასი.

შემადგენლობა და ტრანსფერების დეტალები

“ბარსელონას” სასტარტო შემადგენლობა ასეთი იყო: შჩესნი, ექტორ ფორტი, ანდრეას კრისტენსენი, ჟერარ მარტინი, ჟოფრე ტორენტსი, გილე ფერნანდესი, ბრიან ფარინიასი, რუნი ბარდჯი, იბრაჰიმ დიარა, შეინ კლუივერტი და ჰამზა აბდელკარიმი.

მეორე ტაიმში მოედანზე გამოვიდნენ: ტერ შტეგენი (რომელიც “აიაქსში” გადასვლასთან ახლოსაა), მარკ კასადო, ტომი მარკესი, ებრიმა ტუნკარა, ალექს გონსალესი, ჩავი ესპარტი, ტონი ფერნანდესი და ორიან გორენი. აღსანიშნავია, რომ “ევროპას” რიგებში ითამაშა ჟოაუ კანსელუს ძმამ, პედრო ჟოზემ. თავად ჟოაუს ტრანსფერის საბოლოოდ გამოსყიდვაზე კატალონიური კლუბი აქტიურად მუშაობს.

დანაკლისი და ახალწვეულის დებიუტის მოლოდინი

შეხვედრაში მონაწილეობა არ მიუღია გუნდის ახალწვეულს, კარიმ ადეიემის, რომელმაც პარასკევს დილით პირველი ვარჯიში ჩაატარა. სამწვრთნელო შტაბმა ჩათვალა, რომ მისი მოედანზე გასვლა ჯერ ნაადრევი იყო. გერმანელი შემტევი სადებიუტო წუთებს მომდევნო მატჩში მიიღებს.

მოედანზე არ ყოფილან ფერმინ ლოპესი, რონალდ არაუხო, ალეხანდრო ბალდე და მარკ ბერნალი. ბერნალს მცირე დისკომფორტი აწუხებდა და კლუბმა გარისკვა არ ისურვა, დანარჩენები კი ინდივიდუალურ აღდგენით პროცესს გადიან.

დახურული მატჩი და გეგმები

კლუბებს შორის არსებული შეთანხმების თანახმად, მატჩის პირდაპირი ტრანსლაცია არ შემდგარა. “ევროპამ” შეხვედრის დასრულების შემდეგ თავის ოფიციალურ X-ის გვერდზე გულშემატკივრებს აცნობა:

“ორივე კლუბს შორის არსებული შეთანხმების პატივისცემის ნიშნად, რომელიც მატჩის დახურულ კარს მიღმა ჩატარებას გულისხმობდა, შეხვედრის პირდაპირი გაშუქება არ იქნება.”

ამ მატჩით “ბარსელონამ” წინასასეზონო მზადების მეორე კვირა დაასრულა. ჰანსი ფლიკმა ფეხბურთელებს შაბათ-კვირას დასვენების საშუალება მისცა. მომდევნო კვირაში გუნდი ინგლისში გაემგზავრება, სადაც “სენტ ჯორჯს პარკზე” შეკრებას გაივლის და 31 ივლისს “ბირმინგემის” წინააღმდეგ მეორე, უკვე ღია ამხანაგურ მატჩს ჩაატარებს.

ვიდეო