ოფიციალურად: ანდრეას კრისტენსენმა კონტრაქტი

“ბარსელონამ” ოფიციალურად დაადასტურა, რომ ანდრეას კრისტენსენთან ხელშეკრულების 2 წლით გახანგრძლივებაზე შეთანხმებას მიაღწია. 30 წლის დანიელი მცველი კლუბში 2028 წლის 30 ივნისამდე დარჩება. მხარეები შეთანხმებას უახლოეს მომავალში “სპოტიფაი კამპ ნოუს” ოფისებში, სპეციალურ ღონისძიებაზე გააფორმებენ.

ფინანსური მსხვერპლი და კონტრაქტის დეტალები

დანიელ ფეხბურთელს ევროპული და არაბული კლუბებისგან ფინანსურად გაცილებით მომგებიანი შეთავაზებები ჰქონდა, თუმცა მისი სურვილი თავიდანვე “ბარსელონაში” დარჩენა იყო. კრისტენსენი და მისი ოჯახი კატალონიის დედაქალაქში თავს ბედნიერად გრძნობენ, რის გამოც მცველი ხელფასის საგრძნობლად შემცირებას დათანხმდა. თავის მხრივ, ეს ნაბიჯი 2026-2027 წლების სეზონისთვის კლუბს სახელფასო ფონდის დარეგულირებაში მნიშვნელოვნად დაეხმარება.

ახალი ხელშეკრულება 2-წლიანია, თუმცა შეთანხმების მიხედვით, ორივე მხარე იტოვებს უფლებას, რომ სურვილის შემთხვევაში, პირველი სეზონის დასრულების შემდეგ მეორე წელი გააუქმოს.

ფლიკის ნდობა და სტატისტიკა

ჰანსი ფლიკი დანიელს სრულად ენდობა. გერმანელი სპეციალისტი მის დაცვით საიმედოობასა და უნივერსალურობას (ცენტრალურ მცველად და საყრდენ ნახევარმცველად თამაშის უნარს) უაღრესად აფასებს. “ჩელსიდან” 2022 წელს გადმოსვლის შემდეგ, კრისტენსენისთვის მომავალი სეზონი ლურჯ-ბროწეულისფერი მაისურით მეხუთე იქნება.

ამ ოთხი სეზონის განმავლობაში მან პირველი გუნდის რიგებში 98 ოფიციალური მატჩი ჩაატარა (71 ლა ლიგაში, 15 ჩემპიონთა ლიგაზე, 2 ევროპა ლიგაზე, 6 ესპანეთის თასსა და 4 ესპანეთის სუპერ თასზე). აღნიშნულ პერიოდში მან 3-ჯერ ლა ლიგა, ერთხელ ესპანეთის თასი და 3-ჯერ ესპანეთის სუპერ თასი მოიგო.

ტრავმის შემდეგ დაბრუნება

2025/26 წლების სეზონში კრისტენსენმა მუხლის მძიმე ტრავმა მიიღო, რის გამოც თითქმის ექვსი თვე გაუცდა. ის მოედანს სეზონის ბოლოს, მაისში, “ვალენსიასთან” გასვლით მატჩში დაუბრუნდა. ახლა უკვე სრულად გამოჯანმრთელებული დანიელი მზადაა, რომ თავისი საერთაშორისო გამოცდილება და ლიდერული თვისებები “ბარსელონას” დაცვის ხაზს კვლავ მოახმაროს. კლუბის ხელმძღვანელობა დიდად აფასებს ფეხბურთელის ძალისხმევას, რომელმაც უკეთეს შეთავაზებებზე უარის თქმითა და რთულ მომენტებში თავდადებით, ნამდვილი გუნდური მოთამაშის თვისებები გამოავლინა.