ლამინ იამალის სადებიუტო გოლი მსოფლიო ჩემპიონატზე

თანამედროვეობის უმთავრესმა საფეხბურთო ტალანტმა, ლამინ იამალმა მსოფლიო ჩემპიონატებზე გოლების თავისი ანგარიში გახსნა.

დღეს ესპანეთი მუნდიალის მეორე ტურში საუდის არაბეთს დაუპირისპირდა. ევროპის მოქმედმა ჩემპიონებმა მარტივად იმარჯვეს, რაშიც დიდი წვლილი, რა თქმა უნდა “ბარსელონელებმაც” შეიტანეს.

“ფურია როხას” სასტარტო შემადგენლობაში 4 “ბლაუგრანელი” ვიხილეთ – პაუ კუბარსი, პედრი, დანი ოლმო, ლამინ იამალი. კუბარსიმ 90 წუთი ითამაშა, პედრიმ 70, ოლმომ 61, ხოლო იამალმა 45.

თუმცა ლამინს გოლის გასატანად ერთი ტაიმიც ეყო, უფრო სწორად, 10 წუთი. შეხვედრის გმირის, მიკელ ოიარსაბალის (2 გოლი, 1 ასისტი) ძალიან კარგი გადაცემის შემდეგ “ბარსას” 18 წლის შემტევი ცარიელი კარის წინ აღმოჩნდა და მანაც კარიერაში ერთ-ერთი ყველაზე მარტივი გოლი გაიტანა.

თავის გამოჩენა მოახერხა დანი ოლმომაც. 24-ე წუთზე მიკელ ოიარსაბალმა დუბლი სწორედ “ბარსას” შემტევი ნახევარმცველის გადაცემით გაიფორმა.

თამაშის მიწურულს გოლი გაიტანა მოედანზე 46-ე წუთზე შესულმა ფერან ტორესმაც, მაგრამ მისი გოლი თამაშგარე მდგომარეობის გამო გაუქმდა. რაც შეეხებათ ერიკ გარსიას, ჟოან გარსიასა და გავის, ისინი სათადარიგოთა შორის დარჩნენ.