კუკურელია ბარსელონას ელოდება – ტრანსფერი ბალდეს მომავალზეა დამოკიდებული

27 წლის მარკ კუკურელიას მთავარი პრიორიტეტი “ბარსელონაში” თამაშია. თუმცა, მან იცის, რომ მოკლევადიან პერსპექტივაში ეს გარანტირებული არ არის, რადგან კატალონიურ კლუბს სატრანსფერო ბაზარზე სხვა პრიორიტეტები აქვს. მათ შორის უმთავრესი – რობერტ ლევანდოვსკის კონტრაქტის ამოწურვისა და წასვლის შემდეგ ცენტრალური თავდამსხმელის დამატება. გარდა ამისა, ფეხბურთელისთვის ცნობილია, რომ მისი ტრანსფერი ალეხანდრო ბალდეს სიტუაციაზე პირდაპირაა დამოკიდებული – კუკურელია გუნდში მხოლოდ იმ შემთხვევაში მივა, თუ ბალდე წავა.

მიუხედავად ყველაფრისა, კატალონიელ მცველს გადაწყვეტილი აქვს, რომ “ჩელსიში” თავისი ეტაპი დაასრულოს. ამის საუკეთესო მტკიცებულება ისაა, რომ კუკურელიამ კლუბს (რომელთანაც კონტრაქტი 2029 წლამდე აკავშირებს) წასვლის სურვილის შესახებ უკვე შეატყობინა. “სტემფორდ ბრიჯზე” მისი დრო ამოიწურა და ლონდონელებსაც ესმით, რომ საუკეთესო გამოსავალი ზაფხულში მისი გაყიდვაა, თუკი ფეხბურთელის ხარისხისა და მასში გადახდილი თანხის შესაბამისი შეთავაზება იქნება.

სატრანსფერო ღირებულება და სხვა პრეტენდენტები

“ჩელსი” მარცხენა მცველს 40-დან 50 მილიონ ევრომდე აფასებს. 2022 წელს განხორციელებული დიდი ინვესტიციის შემდეგ (როცა “ბრაიტონს” 68 მილიონი ევრო გადაუხადეს), კლუბი მიიჩნევს, რომ ეს გონივრული ფასია ისეთი გარიგებისთვის, რომელიც ყველა მხარეს დააკმაყოფილებს.

კუკურელიას სიტუაციას ევროპული ფეხბურთის რამდენიმე გრანდი ყურადღებით აკვირდება. “ბარსელონა” მის მიმართ ინტერესს ინარჩუნებს – ჰანსი ფლიკს ის თავისი ტექნიკური, ფიზიკური და ტაქტიკური მონაცემების გამო ძალიან მოსწონს. თავის მხრივ, კუკურელიაც დიდი სიამოვნებით დაბრუნდებოდა მშობლიურ კლუბში და კვლავ მოირგებდა “ბლაუგრანას” მაისურს. მიუხედავად ამისა, ეს ნაბიჯი მთლიანად ალეხანდრო ბალდეს შესაძლო წასვლაზეა დამოკიდებული.

გარდა ამისა, ფეხბურთელის მიმართ ინტერესი პრემიერ ლიგასა და სხვა ტოპ ჩემპიონატებშიც არსებობს. “მანჩესტერ სიტი”, “მანჩესტერ იუნაიტედი”, “ატლეტიკო” და “რეალ მადრიდი” ბოლო თვეების განმავლობაში მის ირგვლივ განვითარებულ მოვლენებს აქტიურად ადევნებენ თვალს. ესპანურ ბაზარზე ყველაზე დიდ სურვილს “ატლეტიკო” იჩენს. რამდენიმე თვის წინ მარკით “ბაიერნიც” დაინტერესდა, თუმცა ეს ვარიანტი პრაქტიკულად გამორიცხულია.

მოლოდინი მსოფლიო ჩემპიონატის ფონზე

ამ ეტაპზე კუკურელია თავისი მომავლის გარკვევას არ ჩქარობს. ფეხბურთელი სრულად მსოფლიო ჩემპიონატზეა კონცენტრირებული და საბოლოო გადაწყვეტილების მიღებას ტურნირის დასრულების შემდეგ აპირებს. ის მზად არის, “ბარსელონას” ბოლომდე დაელოდოს, თუკი კატალონიური კლუბისგან მყარი გარანტია ექნება, მაგრამ რეალობა ისაა, რომ ამჟამად გუნდს ამის შეთავაზება არ შეუძლია, რადგან სხვა პრიორიტეტები აქვს.

თუმცა, სატრანსფერო ფანჯარა ღიაა და სიტუაცია შეიძლება სწრაფად შეიცვალოს, თუ 22 წლის ბალდე კლუბის გამოცვლას გადაწყვეტს. მას კონტრაქტი 2028 წლამდე აქვს და ჯერჯერობით წასვლას არ გეგმავს, თუმცა სეზონი არცთუ ისე კარგ განწყობაზე დაასრულა – ზამთარში მოსულმა ჟოაუ კანსელუმ ფლიკის თვალში მარცხენა ფლანგზე ძირითად შემადგენლობაში ადგილი დაიმკვიდრა.

პარალელურად, თუ მარკ კუკურელია ეკონომიკურად მომგებიან და სპორტული კუთხით დამაჯერებელ წინადადებას მიიღებს, არ არის გამორიცხული, რომ მოვლენები დაჩქარდეს და თავისი მომავალი მოსალოდნელზე ადრე გადაწყვიტოს.