პეპ გვარდიოლა: ჩემპიონთა ლიგა პროექტებს ანადგურებს, იმედი მაქვს, ბარსას შემთხვევაში ასე არ მოხდება

პეპ გვარდიოლა შაბათს მანრესაში იმყოფებოდა, სადაც იოჰან კრუიფის ფონდის ინიციატივით შექმნილი საფეხბურთო მოედნის (Cruyff Court) გახსნას დაესწრო. “მანჩესტერ სიტის” ყოფილმა მწვრთნელმა, რომელიც კრუიფის ფონდის მფარველია, საფეხბურთო აქტუალურ თემებზე, “ბარსელონასა” და სატრანსფერო ბაზარზე ისაუბრა, სადაც ინგლისური კლუბის რამდენიმე ფეხბურთელი ყურადღების ცენტრშია.

ჰანსი ფლიკი და “ბარსელონას” თამაში

პირველ რიგში, მან “ბარსელონასა” და მათ მიერ ჩატარებულ სეზონზე გაამახვილა ყურადღება:

იქნება ეს “ლა მასიას” ფეხბურთელებით თუ გარედან მოსული მოთამაშეებით, მათ ორი არაჩვეულებრივი წელი გაატარეს, მიღწეული შედეგების მიღმა. ჰანსი ფლიკის დიდი გულშემატკივარი ვარ. ამ გუნდის თამაშის ყურება ძალიან მიმზიდველია და იმედი მაქვს, კიდევ ბევრი წელი ასე გააგრძელებენ.

ჩემპიონთა ლიგის საშიშროება

მწვრთნელმა ხაზი გაუსვა იმას, თუ რაოდენ საშიშია ჩემპიონთა ლიგის მოგებაზე აკვიატება:

ეს ტურნირი პროექტებს ანადგურებს; იმედი მაქვს, “ბარსელონას” შემთხვევაში ასე არ მოხდება. ლა ლიგა არის ის, რაც სტაბილურობას გაძლევს. ჩემპიონთა ლიგაზე ძალიან მნიშვნელოვანია დასკვნით ეტაპზე კარგ ფორმაში და ტრავმების გარეშე მისვლა, ასევე იმის გათვალისწინება, რომ ამ ტურნირზე მსაჯების გავლენა უდიდესია. მთავარია, ყოველდღიურად ზრდა გააგრძელო და არ იფიქრო, რომ ფინალში ვერგასვლის ან ვერმოგების გამო, ცუდი სეზონი გქონდა. საზომი შიდა ჩემპიონატებია.

ბერნარდუ სილვა და მომავალი

მომდევნო სეზონისთვის “ბარსელონას” ერთ-ერთი მთავარი სამიზნე ბერნარდუ სილვაა 0 ფეხბურთელი, რომელიც ბოლო წლებში “მანჩესტერ სიტიში” სწორედ გვარდიოლას ხელმძღვანელობით თამაშობდა. “ბერნარდუ ზედმეტად კარგია. ის უპრობლემოდ მოერგება ნებისმიერ გუნდს,” – აღნიშნა პეპმა.

რაც შეეხება საკუთარ მომავალს, გვარდიოლას ამაზე საუბარი არ სურდა. ის ბარსელონაში დაბინავდება და გარკვეული დროით დაისვენებს. “მე თვითონაც არ ვიცი, რას გავაკეთებ,” – დასძინა მან.