აბდემ და იან ვირხილიმ, შესაძლოა, ენტონი გორდონის ტრანსფერი გააიაფონ

მიუხედავად იმისა, რომ კატალონიურმა კლუბმა “ნიუკასლთან” 70 მილიონ ფიქსირებულ ევროსა და 10 მილიონ ბონუსებზე მიაღწია შეთანხმებას, “ბარსელონას” შეუძლია 24 წლის ინგლისელი გარემარბის ტრანსფერი მნიშვნელოვნად გააიაფოს იმ მოთამაშეების ხარჯზე, რომლებზეც გარკვეულ უფლებებს კვლავ ფლობს: ეზ აბდე და იან ვირხილი.

Mundo Deportivo-ს ცნობით, “ნიუკასლმა” გორდონის შემცვლელად “რეალ ბეტისის” გარემარბი აბდე ეზალზული შეარჩია, რომლის სატრანსფერო უფლებების 20%-საც “ბარსელონა” ინარჩუნებს. თავის მხრივ, ანდალუსიურ კლუბს აბდეს ჩანაცვლება “რეალ მალიორკას” თავდამსხმელის, იან ვირხილის დამატებით სურს. აღსანიშნავია, რომ გასულ ზაფხულს ბალეარულ კლუბში ფეხბურთელის სულ რაღაც 3.5 მილიონ ევროდ გაყიდვის შემდეგ, “ბარსელონამ” მისი მომავალი ტრანსფერიდან მისაღები თანხის 40% დაიტოვა.

თუ ენტონი გორდონის “ნიუკასლიდან” “ბარსელონაში” გადმოსვლამ აბდესა და ვირხილის ტრანსფერებიც გამოიწვია, მაშინ “ბარსელონას” ინგლისელის დამატება რეალურად უფრო იაფი დაუჯდება, ვიდრე ეს თავიდან იყო გათვალისწინებული.