ჰანსი ფლიკის კომენტარის ოსასუნასთან მოგების შემდეგ

“ბარსელონას” მთავარმა მწვრთნელმა, ჰანსი ფლიკმა მორიგი მნიშვნელოვანი გამარჯვების შემდეგ პრესკონფერენციაზე ისაუბრა. გერმანელმა სპეციალისტმა აღნიშნა, რომ გუნდმა თავისი საქმე გააკეთა და ახლა ჩემპიონობის გასანაღდებლად მოვლენების განვითარებას ელოდება.

“ფეხბურთელები ზეიმობენ. ეს ჩვენთვის დიდი გამარჯვებაა. აქ მოგება გვინდოდა. რთული თამაში იყო, განსაკუთრებით პირველ ტაიმში, და რა თქმა უნდა, ორი გოლის გატანა ძალიან მნიშვნელოვანი იყო. ასე რომ, ნამდვილად ბედნიერი ვარ გუნდის, კლუბისა და ჩვენი გულშემატკივრების გამო”.

კითხვაზე, იზეიმებენ თუ არა ჩემპიონობას ხვალ ან მომდევნო კვირაში “სპოტიფაი კამპ ნოუზე” “რეალ მადრიდის” წინააღმდეგ გასამართ შეხვედრაში, გერმანელმა უპასუხა:

“ვფიქრობ, ჩვენ დღეს ჩვენი საქმე გავაკეთეთ და დანარჩენი, რაც მოხდება, ჩვენს ხელში აღარ არის, ასე რომ, ვნახავთ. რა თქმა უნდა, ვიზეიმებთ, თუ ხვალვე გავხდებით ჩემპიონები, მაგრამ საბოლოოდ, არის ისე, როგორც არის. “რეალ მადრიდმა” “ესპანიოლის” წინააღმდეგ უნდა ითამაშოს და ჩვენ უნდა დაველოდოთ.”

მან იქვე დასძინა, რომ თავს ჩემპიონებად ჯერ არ გრძნობენ:

“არა, ამის დრო ჯერ არ არის. უნდა დაველოდოთ. შესაძლოა ხვალ, შესაძლოა მომდევნო კვირაში. ეს არ ვიცით, მაგრამ ჩვენი საქმე გავაკეთეთ. და სწორედ ამას ვაფასებ ძალიან ჩემს გუნდში.”

მწვრთნელმა მიმდინარე სეზონის მთავარ გამოწვევასა და მომავალზეც გაამახვილა ყურადღება. მისი თქმით, ტრავმების სიმრავლე მთავარი პრობლემა იყო:

“ვფიქრობ, ბევრი ტრავმის მართვა მოგვიწია. ასე რომ, ეს ის საკითხია, რაც მომდევნო სეზონში უკეთ უნდა გავაკეთოთ. მაგრამ მეორე მხრივ, ის, თუ როგორ თამაშობს გუნდი, ფანტასტიკურია. ფეხბურთელები იზრდებიან და ამ ყველაფრით ბევრად უმჯობესდებიან. ბედნიერი ვარ, რადგან ახალგაზრდა გუნდი გვყავს და მათ განვითარებისთვის სივრცე აქვთ. მათ დიდი პოტენციალი გააჩნიათ და ეს არის ის, რაზეც მომდევნო სეზონში მუშაობა გვსურს.”

ფლიკმა გუნდში არსებული ატმოსფეროც შეაფასა და კონკურენტის, “რეალ მადრიდის” მატჩის ყურებასთან დაკავშირებით იხუმრა კიდეც.

“ჩემთვის ეს ფანტასტიკური თამაში და ფანტასტიკური მაგალითი იყო. პოზიტიური ატმოსფერო გვაქვს, ყველა ძალიან კარგ ხასიათზეა და საკუთარ საუკეთესო დონეზე იმყოფება. ამ მომენტში ეს ფანტასტიკურია. ვუტურებ თუ არა “რეალ მადრიდის” თამაშს? დარწმუნებული არ ვარ. შესაძლოა ხვალ “მაგო პოპის” სანახავად წავიდე, ბოლო დღეა. შესაძლოა, ჩემს მეუღლესთან ერთად წავიდე.”