მას შემდეგ, რაც ხოსეპ გვარდიოლა კატალონიის “ბარსელონას” ჩაუდგა სათავეში, უკვე მოახერხა და 50-ე საჩემპიონთალიგო მატჩი გამართა. ოთხწლიანი მწვრთნელობის დროს მან მოახერხა და ყოველ წელს 1/2 ფინალში გაიყვანა გუნდი. 2008/2009 წლებში მან 15 ჩემპიონთა ლიგის მატჩი გამართა (შეგახსენებთ, რომ იმ წელს კატალონიელები საკვალიფიკაციო ეტაპზეც ასპარეზობდნენ), 2009/2010 წელს 12 შეხვედრას მოუყარა თავი, 2010/2011-ში – 13-ს და 2011/2012-ში – 10 (აღსანიშნავია, რომ გუნდი 1/2 ფინალში შესაბამისად +2 მატჩი აქვს ჩასატარებელი).
გვარდიოლას შეგირდებმა 50-დან 31-ჯერ იმარჯვეს, 14-ჯერ ფრე ითამაშეს და მხოლოდ 5-ჯერ დამარცხდნენ. გუნდმა 119 გოლი გაიტანა (საშუალოდ მატჩში 2.4) და გაუშვა 40 (0.8 ერთ მატჩში). აღსანიშნავია ის ფაქტიც, რომ 3 მცდელობიდან 2-ჯერ პეპი დაეუფლა ყველაზე პრესტიჟულ ტიტულს და მიმდინარე სეზონში შესაძლებლობა აქვს კიდევ ერთი შემატოს მუზეუმს.
ალვეშის მე-200 “ბარსელონაში”
დანიელ ალვეშმა თავისი მე-200 შეხვედრა ჩაატარა “ბარსელონას” მაისურით იტალიური “მილანის” წინააღმდეგ. ლა ლიგაში 125-ჯერ დაიცვა გუნდის ღირსება, ჩემპიონთა ლიგაზე – 43-ჯერ, თასზე – 21-ჯერ, ესპანეთის სუპერ-თასზე – 6-ჯერ, ევროპის სუპერ-თასზე – 2-ჯერ და მსოფლიოს საკლუბო ჩემპიონატზე 3-ჯერ. მიუხედავად იმისა, რომ ბრაზილიელი მცველია, მან 15 გოლს მოუყარა თავი 3 სეზონნახევრის განმავლობაში.
