ბარსელონელები ნაკრებში – 2 გოლი და 2 ქულა

მსოფლიოს 2022 წლის ჩემპიონატის შესარჩევი ეტაპი დაიწყო. დაიწყო ის “ბარსელონას” ფეხბურთელებისთვის არცთუ წარმატებით.

ნიდერლანდები

შესარჩევი ციკლის პირველ მატჩში ერთმანეთს თურქეთი და ფრენკი დე იონგის ნიდერლანდები დაუპირისპირდნენ. მე-2 ტაიმის დასაწყისში მასპინძლები უკვე 3-0 იგებდნენ. 75-ე და 76-ე წუთებზე ნიდერლანდელებმა 2 ბურთი კი გაქვითეს, მაგრამ საბოლოოდ 2-4 დამარცხდნენ.

ფრენკი დე იონგმა სრულად ითამაშა. მოედანზე ასევე 90 წუთი გაატარეს “ბარსელონას” სამიზნეებმა, მემფის დეპაიმ და ვეინალდუმმა. პირველმა მათგანმა საგოლე გადაცემა გააკეთა, 94-ე წუთზე კი თერთმეტმეტრიანი ვერ გამოიყენა.

ბოსნია

ფინეთთან სტუმრად ქულა აიღო მირალემ პიანიჩის ბოსნიამ. ანგარიში სწორედ “ბარსას” ნახევარმცველმა გახსნა. 30 წლის ფეხბურთელს თერთმეტმეტრიანი მეკარემ აუღო, მაგრამ მირალემმა დამატებაზე ივარგა.

პიანიჩმა შეხვედრა სრულად ჩაატარა.

საფრანგეთი

მსოფლიოს მოქმედმა ჩემპიონმა ქულები უკრაინასთან გამართულ საშინაო შეხვედრაში დაკარგა. მე-19 წუთზე მასპინძლები ანტუან გრიზმანმა ძალიან ლამაზი გოლით დააწინაურა, მაგრამ 57-ე წუთზე კიმპემბემ ავტოგოლი გაიტანა და საბოლოო შედეგი დააფიქსირა.

გრიზმანმა 90 წუთი ითამაშა, უსმან დემბელე მოედანზე 64-ე წუთზე გამოჩნდა, ხოლო კლემან ლანგლე სათადარიგო იყო.