მატჩისშემდგომი მიმოხილვა: რეალს ფეხი დაუცდა

სურდა ხავიერ ტებასს როგორმე ინტრიგა შენარჩუნებულიყო ლა ლიგაში და ბოლომდე ჰყოლოდა მაყურებელი ჩემპიონატს, სურდა რომ მოეგო “რეალ მადრიდს” და წაეგო ბარსას, მაგრამ არაფერი ამ ამბიდან არ გამოვიდა, ინტრიგა დიდი ხნის წინ მოკვდა, ამ ტურში კიდევ საერთოდ დასამარდა. თუმცა, მთავარი ამბავი არ ყოფილა ბარსას მოგება, მთავარი ამბავი მადრიდელთა დაკარგული ქულებია სევილიაში, ასე დაასრულეს ოცნება ჩემპიონობაზე და ასე ასრულებენ სეზონს ტიტულის გარეშე. ჰანსი ფლიკის ბარსა კი ზედიზედ მეორე ლა ლიგას უახლოვდება. არ არის მარტივი საქმე. მეტი გვსურდა, რა თქმა უნდა, ბარსელონაში ყოველთვის ასეა, მაგრამ საერთო ჯამში ზედიზედ ორჯერ ჩემპიონობა დიდი ამბავია.

ჯერ არაო ჰანსიმ თქვა, ფეხბურთს ხუმრობა არ უყვარს და ოფიციალურად ჯერ არ ვართ ჩემპიონებიო. კი ბატონო. ფეხბურთს უკვე ყველაფერი უნახავს და სიფრთხილეს თავი არ სტკივა, სიფრთხილე ასპირინით მოძრაობს.

არ უთამაშია ლამინე იამალს და ვერც ითამაშებს სეზონის ბოლომდე. მიუხედავად ამისა, შეგვიძლია ვთქვათ რომ ამ სეზონშიც საუკეთესო იყო და მისი ძალიან დიდი დამსახურებაა ბარსას პირველი ადგილი. გასულ სეზონში თუ რაფინია უმშვენებდა გვერდს და პედრიც არ ჩამორჩებოდა, ახლა ლამინე გამოკვეთილად საუკეთესო იყო, განსაკუთრებით სეზონის მეორე ნახევარში. წინ კიდევ მსოფლიო ჩემპიონატია და იმედია იამალთან ერთად რაფინიაც მომჯობინდება, ლამინეს გამოჯანმრთელებას არა მხოლოდ მთელი ესპანეთი, არამედ მთელი მსოფლიო ელის. მისგან დიდ საქმეებს ელიან, პირველი მუნდიალი იქნება და ყველა რაღაც განსაკუთრებულის მოლოდინშია. მანამდე კი საქმე ბოლომდეა მისაყვანი.

ფერმინი და რაშფორდი

უკვე იმის თქმაც შეგვიძლია რომ რაშფორდის ტრანსფერმა გაამართლა. რასაც ველოდით ის ვნახეთ, არც მეტი და არც ნაკლები. რაფინიას მთელი სეზონის განმავლობაში არაერთხელ მოუწია უქმობა და რაშფორდი ყოველ ჯერზე მზად იყო. ნეიმარი რომ არ მოგვყავდა ეს ხომ თავიდანვე ნათელი იყო, რისთვისაც მოიყვანეს ის საქმე კი შეასრულა ხუთიანზე. აგერ, ამ შეხვედრაშიც კარგი გოლი შეაგდო და ორამდე გაზარდა ანგარიში. გაიქცა ერთი-ერთზე სიღრმიდან, წამით არ დაუგდია სიჩქარე და დარტყმაც მშვენიერი გამოუვიდა. საამაყოდ აქვს საქმე, ბარსასთან ერთად ლა ლიგას იგებს. არადა, ჯერ “მანჩესტერში” მაგრად წვალობდა, მერე კიდევ “ასტონ ვილაში” , რომელიც გრანდად ნამდვილად ვერ ჩაითვლება. ახლა კიდევ ერთ ნაბიჯშია ჩემპიონობასთან. წესით კმაყოფილი უნდა იყოს და არც მე მეწყინება თუ კიდევ ერთი სეზონით დარჩება გუნდში.

ანგარიში ფერმინ ლოპესმა გახსნა. ჯერ კიდევ პირველ ტაიმში, პედრის გადასარევი პასი შეირგო. საერთოდ, კარგი სეზონი აქვს, შედეგიანი, პროდიქტიული, მაგრამ ვაი რომ პირველი რაც მახსენდება მისი გაფუჭებული მომენტი და გატეხილი ცხვირია. აქ სიზუსტე და ბარსას ნახევარფინალი ერთი იქნებოდა. არ ხდება ყველაფერი ისე როგორც გვსურს. რაშფორდის მსგავსად, ფერმინის დარჩენაც გამახარებს. უკვე დიდი ხანია სარფიან შეთავაზებებს იღებს გუნდი მის თაობაზე, მაგრამ რატომ უნდა გაუშვა ფეხბურთელი, რომელიც ასე სწრაფად პროგრესირებს?!

დიდი გადალაგება კი იქნება საჭირო. განსაკუთრებით წინა ხაზში. იქ სადაც ლევანდოვსკი და ფერანი ცვლიან ერთმანეთს. ვინმე სტაბილურად გამტანია მოსაყვანი. ჩვენ კი გვინდა მიქაუტაძე, მაგრამ ამის შანსი ძალიან დაბალი მგონია. გვინდა ალვარესი, მაგრამ მისი ფასიდან გამომდინარე ეგეც ნაკლებად სავარაუდოა. მაშ ვინ მოვა გუნდში? სიმართლე გითხრათ, მგონია, რომ მსოფლიო ჩემპიონატს დაელოდებიან, იქ ვინმე ნაკლებად ცნობილი გამოიჩენს თავს და ზუსტად ეგ კაცი შეგვრჩება ხელში. მერე კი ვნახოთ.

წინ რა გველის

წინ გველის გასვლა ოსასუნასთან და ელ კლასიკო “კამპ ნოუზე”. არ გამოტოვოთ, არაფრით, ამ დღეს “კამპ ნოუ” ჩემპიონობას იზეიმებს, ერთი წამით არ გაჩერდება. მოენატრა ხალხს “კამპ ნოუზე” ზეიმი.