მატჩისშემდგომი მიმოხილვა: ბარსა იგებს, იამალი ერთობა

   დასაწყისი მშვენიერია, “ბარსამ” “მალიორკა” 3:0 დაამარცხა და პირველი სამი ქულაც ჩაიწერა. ბევრი რამით ნიშანდობლივი თამაში იყო, თითქოს სეზონის ანონსი ვიხილეთ, იმის ნაგლეჯი ვნახეთ, რასაც მთელი სეზონის განმავლობაში შევხედავთ – იამალის გოლი, მისივე საგოლე პასი და ესპანელი მსაჯების გაოგნებული სახე. გუშინ დაიწყო და ამას ბოლო აღარ ექნება. 

განაცხადში არ ყოფილან შტეგენი და შესნი, მათ ნაცვლად პენია და კოხენი ისხდნენ, ამდენი მეკარე რა ჯანდაბად უნდა ერთ კლუბს არ ვიცი, წასვლითაც არავინ მიდის. ტრავმის გამო არ იყო ლევანდოვსკი, თვის ბოლოს ელიან ბერნალს და არ ყოფილა არც ჟერარ მარტინი. სამაგიეროდ, განაცხადში მოხვდა სამივე ფერნანდესი – დრო, ჟიული და ანტონიო. იქვე იყო ჟოფრე ტორენტსიც, რომელიც მოგვიანებით ჩაერთო თამაშში. 

მეკარე – ჟოან გარსია; მცველები – ერიკ გარსია, არაუხო, კუბარსი, ბალდე; ნახევარმცველები – დე იონგი, პედრი, ფერმინი; თავდამსხმელები – იამალი, რაფინია, ფერანი; 

საკითხავი აი ეს არის!

გოლია კი, თამაში იქამდე გრძელდება სანამ მსაჯი არ გააჩერებს, ამაზე ახალი წესი ხომ წლების წინ მიიღეს?! თავისით არავინ ჩერდება. ეს გარემოება რომ პრობლემებს ქმნიდა მოედანზე სწორედ ამიტომ დაამტკიცეს ახალი წესი, თორემ ფეხბურთს დიდი ზიანი ადგებოდა. მაგალითად, როგორ დავიცვათ თავი “ბარსელონასგან”? გაწექი მოედანზე! 

ახლა ეგ აღარ მუშაობს, თუ გინდა დაწექი და თუ გინდა გადატრიალდი, სანამ მსაჯი არ დაუსტვენს თამაში გრძელდება და ეს მსაჯებიც უგზოუკვლოდ კი უსტვენენ ხოლმე, მაგრამ ამჯერად არ უჩქარია ხოსე მუნუერას და მშვენიერი გოლიც ვიხილეთ. არ განძრეულა დომინიკ გრიფი, თვალი გააყოლა მხოლოდ ბურთს, რას ელოდა? რა ვიცი აბა.. 

მცველს თავში მოხვდა ბურთი, არც ისე ძლიერად, თან რამდენადაც დავინახე შუბლი დაახვედრა რაც საერთოდ არ უნდა ყოფილიყო პრობლემა, მაგრამ დაეცა ბრძოლის ველზე და იფორთხიალა მერე კაი ხანს. არა, ამ კაცისგან მცველი არ დადგება და თუ მცველი არ დადგება, ესე იგი, ფეხბურთელიც ვერ დადგება, იმიტომ რომ შემტევის უნარიც ისე არ აქვს, როგორც მცველის. 

სახელიც გაიტეხა და მგონი თავიც. 

ფერან ტორესმა კი მშვენიერი გოლი შეაგდო, შეირგო ლევანდოვსკის არ ყოფნა. 

აქ ანგარიში უკვე 2:0 გახდა. კი შეჰყვირეს “მალიორკას” ქომაგებმა, მაგრამ გოლი მაინც ჩაითვალა და კუნძულზეც მიხვდნენ, რომ ყველაფერი ლოგიკურად დაიწყო – “ბარსასთან” წააგეს. პირველი გოლი რაფინიასგან მიიღეს. კარგი ამბავია, რომ ბრაზილიელმა გოლით დაიწყო, ეს სეზონი მისთვის ტესტი იქნება, ახლა ყველას აინტერესებს ერთი სეზონის გაელვებასთან ხომ არ გვაქვს საქმე, ნამდვილად გადადგა თუ არა რაფინიამ ის ნაბიჯი კარიერაში, რომელსაც ფეხბურთელები იშვიათად დგამენ, ესე იგი, ნამდვილად გადააბიჯა თუ არა საკუთარ შესაძლებლობებს – ვნახოთ, დასაწყისი კარგია. 

საგოლე პასი ლამინე იამალმა მიითვალა. 

მოდის მოდის, ოქროს ბურთი 

   ახლა მოვა თუ მერე მოვა, აუცილებლად მოვა. ლამინე იამალს ოქროს ბურთი ვერ ასცდება, ეს მისი ბედისწერაა. ეს “ბარსელონას” ათიანების ბედისწერაა. სეზონის პროგნოზებში ვივარაუდეთ რომ საუკეთესო ასისტენტთან ერთად, საუკეთესო ბომბარდირიც ლამინე გახდება, პირველივე მატჩში გვაჩვენა რომ სწორი გეზი აქვს, საგოლეც მიითვალა, გოლიც შეაგდო და მომენტებიც შექმნა. თუმცა, სტატისტიკის მიღმა თუ გავიხედავთ ერთ მაგარ ამბავს დავინახავთ, ლამინე ძალიან მოტივირებული იყო გოლის შესაგდებად, განსაკუთრებით ბოლო წუთებზე, არ უნდოდა გოლის გარეშე გასვლა, ასეთი რამ მესის და რონალდუს ახასიათებდათ, ასეთი შიმშილი ზრდისა და განვითარების მთავარი წყაროა, ეს ის არის, რაც ნეიმარს არასდროს ჰქონია. გოლი კი არიენ რობენისას ჰგავდა, გასულ სეზონშიც რამდენიმე შეაგდო ამ სტილში, მაგრამ ეს ყველაზე მეტად ჰგავდა შუშის ნიდერლანდელის შეგდებულს, ერთი მთავარი დეტალის გამო, ბურთი თან ცენტრისკენ წაიღო, კარის გასწვრივ, თან უკან გასწია დარტყმამდე, ასეთ დროს დარტყმის შესრულება რთულდება, ასეთ დროს მცველს ფაქტობრივად შანსი არ აქვს ბურთზე დაგაფაროს, მაგრამ განსაკუთრებული ტექნიკაა საჭირო კორპუსის გადასაწყობად და ზუსტი დარტყმის შესასრულებლად – ლამინეს ეს შეუძლია, ლამინეს ყველაფერი შეუძლია. 

ისევ განვმეორდები, ბოლო ერთი წლის განმავლობაში მასზე მაგარი ფეხბურთი არავის უთამაშია. ჩემთვის ოქროს ბურთის ნომერ პირველი კანდიდატია. ფენომენს საერთოდ არ უთამაშია ჩემპიონთა ლიგაზე, როცა ოქროს ბურთი მოიგო. როვალდო ჩემპიონთა ლიგის ჯგუფში ჩარჩა ოქროს ბურთი რომ მოიგო. რონალდინიო მერვედფინალიდან გავარდა, მაგრამ მაინც გადასცეს მთავარი ინდივიდუალური ჯილდო. მესისაც ჰქონია სეზონები ხელი რომ მოეცარა ლიგაზე, მაგრამ მაინც დაისაკუთრა ბალონ დორი, იმიტომ, რომ ეს პირველ რიგში, ინდივიდუალური ჯილდოა და არა გუნდური. ამიტომ, ჩემი ხმა ლამინეს. 

ისევ გასვლა 

შეცვლაზე შემოვიდნენ – დანი ოლმო, ტორენტსი, გავი, რაშფორდი, კუნდე. აქედანაც მშვენივრად ჩანს, რომ “ბარსა” ძალიან კარგად დაკომპლექტებული გუნდია. სულ რაღაც 2-3 წლის წინ ამისგან ძალიან შორს ვიყავით, მაგრამ როგორც ბევრჯერ აღმინიშნავს, გუნდი როგორც იქნა, ზედმეტისგან გათავისუფლდა. 

ისევ გასვლა, ისევ გასვლა, სანამ “კამპ ნოუს” წესრიგში არ მოიყვანენ მანამდე “ბარსა” სულ გასვლაზე ითამაშებს. ბოლო ფოტოებიდან რაც გაირჩევა, სულ მცირე სამუშაოებია დარჩენილი, ქვედა იარუსზე და ლოჟაში. ზედა იარუსების კეთება კიდევ დიდხანს გასტანს, მაგრამ ჩვენ ეგ არ შეგვაწუხებს, მატჩის დროს ტრიბუნების ეგ ნაწილი მაინც არ ჩანს და თვალშიც არავის მოხვდება ცუდად. 

მომდევნო მატჩი “ლევანტესთან”! 

აბა, მოვიდა სამი ქულა!