მატჩისშემდგომი მიმოხილვა: ბარსა მზად არის

    გამპერის თასი “ბარსასია”, ოღონდ, უცნაური სანახავი კი იყო, სავარჯიშო მოედანზე ჩატარებული მატჩი. ზოგადად, გამპერის თასზე რომ ვინმეს მოიწვევენ, “კამპ ნოუ” თამაშობს ხოლმე გადამწყვეტ როლს, ჯერ ერთი იმიტომ, რომ ყველას უნდა ამ სტადიონზე თამაში, ვიღაცამ შეიძლება ისე ჩაამთავროს კარიერა რომ არასდროს ეღირსოს, მერე კიდევ, გამპერს მიაგებ პატივს, ამ კედლებს მისი სახელი უნდა ჰქონოდა, მაგრამ დიქტატურის პირობებში ვერ უწოდეს “კამპ ნოუს” გამპერის სახელი, არადა, ყველა ლოგიკით ასე უნდა ყოფილიყო. 

რას ვიზამთ, არ არის მზად საფეხბურთო კათედრალი. როდის იქნება? აბა რა ვიცით.. აქამდე რამდენჯერაც თარიღი თქვეს იმდენჯერ ააცილეს. ამიტომ, აღარ ღირს რომელიმე დღის ლოდინი. მოვა, სად წავა. 

“ბარსას” თავს კი ვერ არის კარგი ამბები, ჯერ ტერ შტეგენი აჯანყდა, მიხვდა, რომ მისი მოცილება უნდათ და მგონი პანიკაშიც ჩავარდა, ამ პანიკის ჟამს კი სიგიჟეები აკეთა. კი დალაგდა ეგ ამბავი, მაგრამ სახელის გატეხას ხომ თავის გატეხა სჯობია?! სტვენა არ ასცდება გერმანელს, კლუბის წინააღმდეგ წასვლა არავის ეპატიება, მასზე დიდი ხალხი, გაცილებით ცუდი ფორმით გაუშვიათ, მაგრამ კლუბის დაზარალება არავის მოსვლის აზრად. 

მერე იყო ლევანდოვსკის ტრავმა, მერე კიდევ ასე მოულოდნელად დაცვის ბურჯმა დაგვტოვა, ინიგოს თურმე კონტრაქტში ჰქონია პუნქტი – არაბეთში მაყუთს თუ დამაყრიან უფასოდ შევძლებ წასვლასო, ჰოდა, დააყარეს. ამას დაუმატეთ რომ ლა ლიგაში თავდაპირველად სულ გასვლაზე მოუწევს “ბარსას” თამაში და უჰ, ცხელი დასაწყისია.. 

პირველი ტაიმი 

გვესტუმრა ფაბრეგასის “კომო”, დიდი ვერაფერი გუნდი, ჩამოჰყვათ სერჟი რობერტო, ტაშიც დაუკრეს, მადლობა გადაუხადეს ყველაფრისთვის. კამერა ხანდახან ბურთს კარგავდა, რადგან “კრუიფზე” მხოლოდ ერთი ტრიბუნაა, მაინცდამაინც ზემოთ ვერ დააყენებ, ამიტომ, ვიზუალურად კარგი სანახავი ვერ გამოდგა მატჩი, აი, შინაარსობრივად მშვენიერი იყო – ბევრი გოლით, ბევრი კარგი მომენტით. 

ჟოან გარსია – ერიკ გარსია, არაუხო, კუბარსი, ბალდე – დე იონგი, პედრი, ფერმინი – ლამინე იამალი, რაფინია, რაშფორდი; ასეთი იყო შემადგენლობა პირველ ტაიმში, მეტოქის სისუსტიდან გამომდინარე ვერ ვნახეთ არაუხო-კუბარსის რეალური შესაძლებლობები, შედარებით მარცხნივ რა თქმა უნდა, კუბარსი დააყენეს, არაუხო ისედაც ბევრ შეცდომას უშვებს და მისთვის პოზიციის შეცვლა საერთოდ დამღუპველი იქნებოდა. ამ სეზონში მის იმედზე უნდა ვიყოთ, ეს გადამწყვეტი წელია მისთვის, ან ნდობას დაიბრუნებს, ან წასვლა მოუწევს. 

ფორვარდის პოზიციაზე ვნახეთ რაშფორდი და ალბათ მივხვდით, რომ ეს კაცი არ არის ფორვარდი, როგორც თავის დროზე ჟოზე ამბობდა, ის გარემარბია, მაგრამ სეზონი დიდია და ფლიკმა იცის, რომ დასჭირდება ამ პოზიციაზეც. საქმე იმაში არ არის, რომ ცარიელ კარს ააცილა და თვითონაც გაოგნებული დარჩა, საქმე იმაშია, რომ ბურთის კაცია, ხშირად უნდა ჰქონდეს ფეხში, სხვანაირად თამაშს ვერ გრძნობს, არც ლევანდოვსკია, რომ კორპუსი ჩააყენოს და ისე მიიღოს, ეგ არ შეუძლია, მცველებს თუ გაექცევა ზურგსუკან, ეგრე კიდევ თამაშში 2-ჯერ 3-ჯერ თუ შეეხება ბურთს. მოკლედ, ცუდი ვარიანტია. განსაკუთრებული ალღოც ვერ აქვს. 

პირველ ტაიმში ფერმინმა დუბლი შეასრულა, კარგი გოლები შეყარა, საერთოდ, იამალს თუ არ ჩავთვლით წინა სეზონის ყველაზე პროგრესირებადი ფეხბურთელია. გავისა და ოლმოს არ ექნებათ იოლი დღეები. საერთოდ არ გამიკვირდება ძირითადში თუ მოიპოვებს ადგილს. რაფინია ჩვეულად ბოლომდე მოტივირებული იყო. გაატანინა კიდეც გოლი იამალს, მცველს კინაღამ ფეხიც წააგლიჯა, მაგრამ მსაჯმა რატომღაც ვერ დაინახა. მანამდე კი თავად შეაგდო, რაშფორდის პასით – აი, ეს იცის ინგლისელმა, როგორ გაიქცეს ფლანგზე და როგორ გააკეთოს იქედან ზუსტი პასი. გოლი ლამაზი იყო. 

მეორე ტაიმი 

ორი ცვლილება მაშინვე განხორციელდა – რაშფორდი ფერანმა შეცვალა, ერიკ გარსია – კუნდემ. რაშფორდმა შანსი ვერ გამოიყენა, მერე კი აღმოჩნდა რომ ფერანმაც ვერ გამოიყენა, ინგლისელის მსგავსად მანაც ვერ შეაგდო ცარიელ კარში. რომელი უფრო შოკისმომგვრელი იყო აბა რა ვიცი, მაგრამ ცუდად მენიშნა. რა უბედურებაა.. ფორვარდებს ცარიელ კარში ვერ გააქვთ ბურთი. 

ამასობაში ლამინემ მეხუთე შეაგდო, თავის სტილში, მარცხენა ფეხით დაატრიალა შორეულ კუთხეში, ეს ძალიან ლამაზი გოლი გამოვიდა. თავად ისეა განწყობილი რომ გაცილებით მეტი გოლი უნდა შეაგდოს ამ სეზონში. ვნახოთ აბა რისი თავი აქვს. 

მოგვიანებით გამოვიდა გავი პედრის ნაცვლად და კასადო დე იონგის ნაცვლად. გავი იმ მძიმე ტრავმის მერე ვერ ახერხებს ძირითადში ადგილის დაბრუნებას, მონდომებულია, რას აღარ ცდილობს, მაგრამ ვერ ახერხებს, მიუხედავად ამისა, თავისი როლი განსაზღვრული აქვს და კლუბისთვის მეტად მნიშვნელოვანი ფიგურაც არის. 

მიწურულს გამოვიდნენ – რუნი, დრო, მარტინი და კრისტენსენი. დამატებითი დრო დაეთმო ტორენტსს. 

გოლი აღარ გასულა. მეორე ტაიმის დასაწყისში მოამთავრეს საქმე. 

სად ვიწყებთ? 

სად და მალიორკაზე, მერე “ლევანტე” იქნება, მერე “რაიო”, სულ გასვლები, სულ შორს, ამიტომ, დიდი მნიშვნელობა ექნება როგორ დავიწყებთ, თავიდანვე თუ აკრიფეს ქულები, მერე ყველაფერი კარგად წავა. 

აბა, ცოტაც მოვიცადოთ და მერე პროგნოზებიც გავაკეთოთ, ტრანსფერი ალბათ აღარ იქნება.